Misiangtho Francisco le Jacinta te Pawini. (February – 20)
Misiangtho Jacinta le Francisco te in Portugal gam, Fatima khua, Tonu kilahna naupang thum te lakah nih ahi uh hi. Francisco in 1908 kumin suakin, Jacinta pen 1910 kumin suak hi. Kum (11) apha Francisco le kum (9) apha Jacinta te in unau hi a, Lucia ahih le Nungak siangtho suakin 2005 kumin si hi. Amaute in Portugal gam, Fatima khua pan hi-in Tuu cing nasep tawh nuntakna ding a zong naupangte ahi uh hi.
1917 kum, May kha le October kha kikal sungah Tonu in hi naupang thum te kiangah (5) vei vilvel kilak hi. Tua sungpan Lucia in Tonu Maria ii ‘aw’ bek a zak hangin Francisco in Tonu Maria amuhna thu a nulepa te, Siampite, khua sung mite kiangah gen hi. Tonu in amaute kiangah nisim in Khi thungetna a nget nading uh le mawhnei mite ading thu anget nading uh vaikha den hi.
Amaute in zong Tonu vaikhakna mah bangin hih uh a, khat veivei ciangin a sun-an nek ding uh nangawn nek-awl in nek ding a neilo mizawngte piakhia in kidekna bawl uh hi.
Khat vei, Francisco in alawm ii Vasa mat pen hehpihhuai salua ahih manin alawm kiangpan sum tawh lei kikin tua Vasa khahkhia kik hi. Amaute in naupangno ahih uh hangin khat veivei ciang, a daang uh a taak mahmah hangin kidekna bawlin tui dawn lo-in a om thei te ahi uh hi.
1918 kum, October kha ciangin Portugal gamah natna khat akizelh ciangin Francisco le Jacinta zong natna ngahin nasia takin damlo uh hi. Tua lai ah Tonu in Vantung ah kong puak ding hi ci-in amaute nih kiangah ki langh hi.
Francisco in gim lua mahmah ahih manin lupna tungpan tho zo lo ahih manin Siangtho Pumpi a san theih nading ngen hi. Amah in apatcil pankipan Tonu ii kilahna hangin Pasian le Tonu Maria te tawh a kinai mahmah khat ahi hi. Biakinn zong kah denin naupang khat ahih hangin kikhop kipatma in khukdinin Siangtho Pumpi zahtakna apia den khat ahi hi. Siangtho Pumpi san na angah, a Siangtho Pumpi san cil ni a zing ciang, 1919 kumin Francisco si hi.
Fracisco a sih zawh kum khat val ciangdong Jacinta in natna thuakin om a, a awm gei pan ki-at in aki bawl hangin nuamtuam tuan lo-in, 1920 kum ciangin si hi.
Misiangtho Jacinta le Francisco te aw…kote adingin thu hong ngetsak un.
