SIANGTHO NI LI NI THU. (MAUNDY THURSDAY)
Maundy Thursday, Siangtho Ni Li Ni cihin Christian thuzuite i Nipi Kaal siangtho hun sungah athupi Ni khat ahi hi.
Hi ni thu leh hong piankhiatna pen Laisiangtho tungtawn in le anuai abangin khen thum tawh kong hawmkhia ding hi.
1. MAUNDY THURSDAY CIH MIN HONG PIANNA THU
“Maundy” cih kammal in Latin kammal “Mandatum” pan hong piangkhia hi a, “Thupiak, thukham (Commandment)” cih khiatna nei hi.
Jn 13: 34 sungah “Keimah in note Thupiak thak khat kong piakin ah: Note khat le khat na ki-it un. Keimah in note kong it bangin note khat le khat na ki-it un” cih kammal siksanin a kasam ahi hi.
2. TANGTHU LE LAISIANGTHO SUNGA THU TE
Maundy Thursday ah Laisiangtho sung pan hong piang hihna adiakdiakin nam (3) om hi.
Nungzuipite khe sawpsakna (Washing of the Feet)
Topa Jesu in anunung nitak annek madeuhin anungzuipite khe silsak hi. Tua hunin khe sil cih pen silate nasep, aniam pen nasep khat ahih hangin Topa Jesu in eite etteh dingin amahmahin sepkhiatna tawh “kiniamkhiatna” le “nasepna” hong lak hi.
Nitak annekna (The Last Supper)
Hi nitak annekna in Jew minamte i Paisan pawi (Passover) abawl hi a, Christian Pawlpi ii athupi pen thu khat ahi, “(Holy Communion) A Siangtho Biakpiakna, Siangtho Pumpi” hong kipatna hun zong ahi hi.
Khomun la a, thupha apiak khit ciangin belnenin a nungzuipite pia a, “hih in ka pumpi hi. La unla, ne un” ci hi. Tua khit ciangin leenggahzu hai zong la in amaute pia a, “hih in mitampite’ mawhna amai nadingin akibuakhia ding thupiakthak ka si hi” ci-in gen hi.
Gestsemane huanah thungetna le kimatna thuakna
Nitakan-nek khit ciangin Jesu in nungzuipite tawh Gestsemane huanah pai-in nasiatakin thungen hi. Tua khit ciangin nungzuipi Judah Iscariot ii lehhekna hangin tua nitak mahin kimatna thuak hi.
3. PHAWKNA TAWH BAWLNATE
Maundy Thursday pen tulai Christian Pawlpi sungah anuai abangin phawkna tawh kibawl hi.
Khe silna – Pawlpi kimkhatte ah makaite in athuzuite khe silsakna tawh kiniamkhiatna lak hi.
Siangtho Pumpi bawlna – Topa Jesu ii sihna thuakna phawk nadingin Khomun le leenggahzu kihel ne uh hi.
Pasian tau siangsakna (Stripping of the Altar)
Biakpiakna tau zepna vante hepkhiatna tawh Topa Jesu ii kimatna thuakna le gentheih thuakna lim lak uh hi.
Maundy Thursday in ki-itna neih nading thupiakthak sanna, khat le khat na kisep sakna le Topa Jesu ii kipiakkhiatna phawkna cih bangin athuthuk khiatna akihel ni khat ahi hi.
