Catholic Nisim Lungdamna Laisiangtho. Thawhkik Pawi Nipi Kaal (2) Na. 17.4.2026 (Fri)

John 6:1-15


1. Tua khit ciangin Jesu in Tiberias tuili a kici, Galilee tuipi galkhat lamah a galkah hi.


2. Mihon tampi in cinate’ tungah a hihsa lim lamdangte mu uh ahih manin ama nung a zui uh hi.
3. Jesu, mual tungah kahto a, a nungzuipite tawh tua lai-ah a tu hi.
4. Tu-in Jew mite’ Paisan(a) pawi bawl hun a nai ta hi.
5. Jesu a khuadak ciangin ama lam zuan a hong pai mihonpite a mu hi. Jesu in Philip’(b) kiangah, “Hih mihonpite’ nek ding khomun koi-ah i lei ding hiam?” a ci hi.
6. Amah in Philip a ze-et nop manin hih bangin a gen ahi hi. Bang hang hiam cih leh amah in bangci-a bawl ding cih a theikhol khin ahi hi.
7. Philip in ama kiangah, “Mi a vekpi-in themkha khat tek a nek dingun kha guk sung thaman Sum denarii za nih man khomun cing lo ding hi,” ci-in a dawng hi.
8. Simon Peter’ nau Andrew a kici ama nungzuipi khat in,
9. “Hih lai-ah naupangno khat in anluum nga le ngasa nih a nei hi. Ahi zongin mihing hizah’ aadingin bang tham hi ding ahi hiam?” a ci hi.
10. Jesu in, “Mipite na tusak un,” a ci hi. Tua munah lopa tampi a om hi. Tua lai-ah pasal tulnga bang a tu uh hi.
11. Tua ciangin Jesu in anluumte la a, lungdam ko-in a tu mihonpite’ lakah a hawmsak hi. Tua mah bangin ngasa zong a duh zahzahun a hawm uh hi.
12. Amaute in a kham khit uh ciangin Jesu in a nungzuipite’ kiangah, “A kikhamvalte khawm kik un. Bangmah mawk valsak kei un,” a ci hi.
13. Tua ahih manin, amaute in a nek khit uh ciangin anluum pum ngate’ pan a neng a themte a khop uh leh seng sawm le seng nih dim a ngah uh hi.
14. Jesu’ na lamdang bawl tua mite in a muh uh ciangin, “Hih pa in leitunga hong pai ding, kamsangpa ahi takpi hi,” a ci uh hi.
15. Mihonpite in zawhthawh thu-in amah a kumpi dingun a koih sawmna uh Jesu in a theih ciangin kihemkhia-in mual tungah amah guak a kahto kik hi.

Hi in Topa’ Lungdamna Laisiangtho ahi hi.