Catholic Nisim Lungdamna Laisiangtho.Hun Nautang Nipi Kaal (9) Na.1.6.2026 (Mon)

Mark 12: 1-12


1. Tua khit ciangin Jesu in amaute’ kiangah thugentehna zangin thu a hilh hi. “Mi khat in lo lai-ah leenggui kungte suan a, a kimkot ah dai a kai hi, leenggah cilna ding to a, tau sang khat a dawh khit ciangin, lokhote khawh lawhsakin a gamla ah khual a zinsan hi.


2. A lak hun a tun ciangin leenggah khawm dingin lo-khawhlawhte’ kiang ah a nasemte khat a sawl hi.
3. Ahi zongin amaute in a nasempa man uh a, satgawpin a hawm ciahsak uh hi.
4. Khatvei a nasem dang khat a sawl kik hi. Amaute in tua pa’ lutang a sat liamsak khit uh ciangin a maizum theih theihna dingin a bawl uh hi.
5. Tua ciangin amah in nasem dang khat sawl kik leuleu a, amaute in tua pa a that uh hi. Nasem adang tampi a sawl hangin amaute in pawlkhat satin, adangte a that uh hi.
6. Lo neipa in a sawl theih ding a it a tapa khat a nei lai hi. A tawpna ah ‘Tua mite in ka tapa a zahtak ding uh hi,’ ci-in a tapa a paisak hi.
7. Ahi zongin lo-khawhlawhte in, ‘Hih pa a inn luah dingpa ahi hi; hong pai un, amah that ni, a luah ding teng ei’ aa suakpah ding hi,’ ci-in khat le khat a kikum uh hi.
8. Tua ahih manin amah manin that uh a, leenggui lo nawlah paaikhia uh hi.
9. Tua bang hi leh leenggui lo neipa in bang a cih ding hiam? Amah hong pai-in lo-khawhlawhte sugawpin that dinga, a leenggui lo midangte a pia ding hi.
10. Note in hih Lai Siangtho sungah sim ngei lo na hi uh hiam? “Innlamte in a nilkhiat uh suang pen, innkiu suang bulpi a suak khin hi;
11. hih thu Topa’ bawl hi a, eite’ mitmuhin a lamdang hi,” a ci hi.
12. Amah in hih thugentehna tawh amaute a cih lam a theih uh ciangin amah matna ding lampi a zong uh hi, ahi zongin amaute in mihonpite kihta uh ahih manin amah nusia uh a, a paikhia uh hi.

Hi in Topa’ Lungdamna Laisiangtho ahi hi.