Siangtho Pumpi Pawi Ni (June 7, 2026)
Ei leitung mite in sih kuan kam vaikhakna te pen ki thupi sim phadiak hi. Ih Nu ih Pa, Ih Pi leh Ih Pu te lak pan a hong nusia sa tampi om kha ding hi. Tua te in a pumpi uh leitungah a om nawnloh uh hangin a tu, a ta te tung uh ah thu hilhna tampi na nei ding aa, tua thu hilhna te thupi sim in a nuntak pih mite aa dingin aNu aPa, a Pi aPu te uh a nungta lai mah tawh ki bang uh hi. Bang hanghiam cih leh a maute ii thu hilhna kammal te a tu, ata te lak ah mang thang lo-in, amau te in nuntak pih uh ahih man ahi hi.
Ahi zongin tua bangin kam vaikhakna te a thupi simlo, a zuilo te aa dingin aNu, aPa, aPi leh aPu te uh pen amaute nuntak na sungah om nawnlo in a mangthang hi ta uh hi.
Tua mah bangin eite in zong Topa Jesu ii hong vaikhak a kammal te thupi simin ih nuntak pih ding kisam pha mahmah hi. Ama hong kam vaikhak te a thupi sim lo, a zuilo mi peuh mah pen ama nung zui ki ci thei lo ding hi. Christian ki ci thei lo hi. Tua ahih manin Topa Jesu kammal a zuilo te pen Christian te a langpang te ki ci thei hi.
Tu ni-in Topa Jesu in (Jn 6:51) na sungah bang hong vaikhak hiam cih leh “Keimah in vantung pana hong kumsuk anungta Khomun ka hi hi. HIh Khomun a ne mia tawntungin a nungta ding hi. Hih Khomun in leitung mite nuntak na dinga ka piak ding ka sa ahi hi” ci-in limtak leh kician tak in thu hong vaikhak hi.
Tua banah (Jn 6:54) na sungah “Ka sa ne a, ka si a dawn peuhmah in nuntak tawntungna a ngah hi. Ni tawpni ciangin tua mi ka thukiksak ding hi” ci-in hong vaikhak hi.
Hi pen leitung mite cih hilo in Topa Jesu mahmah ii a cih ngiat, ei leitung mite in nuntak tawntung nopsakna ih ngah na dingin a hong kam vai khak, ih nek ding aa hong piak a thuthuk mahmah Siangthopumpi (Topa Jesu) ii Silesa ahi hi.
Topa Jesu thu gen te um ing a ci mite sung pan hih Topa Jesu ii kam vaikhak pen thupi sak mahmah in Nungzuipite hun pan ki pan tuni dongin nuntak pih uh hi. Lei tung bei dongin nuntakpih suak lai ding uh hi.
Topa Jesu um ing a ci Sanggam Christian dangte lek ah ih Topa Jesu ii kammal te a awlmawhlo, a thupi simlo leh a lang pang zong mi tampi om lai hi cih thu zong a ki phawk sak ih hi hi.
Topa Jesu ih up leh ama kammal te thupi sakin ih nuntak pih ding kisam pha mahmah hi. Tua ahih manin Siangtho pumpi ih san na pen Topa Jesu ii hong kamciam ahi tawntung nuntak nopsakna ngah na ding ahih na thu phawk ciat ni.
Christian nuntakna sungah a thupi pen pen in Siangthopumpi (Topa Jesu ii Silesa) san na ahi hi. Tua sangin a thupi zaw, a lian zaw Christian nuntakna sungah a dang bang mah om nawnlo hi. Bang hanghiam ciah leh (Jn 6:53) na sungah Topa Jesu in “Ken a man takpi kong genin ah, note in mihing Tapa sa ne lo-in, a si na dawn kei uh leh, note sungah nuntakna omlo hi” ci-in khauh takin hong khin hi.
Topa Jesu in cik mah hun in a kammal te laih ngei lo hi. Tang tung sak den hi. Tua ahih manin Siangtho Pumpi a sang mite khempeuh pen tawntung nuntak nopsakna a ngah ding a ki telsitset teng a hih lam Siangtho Pumpi Pawi ni in a ki phawk kik kik sak ih hi hi.
