A KIPHELKHAM SIANGTHO PUMPI THEM
Siampipa in bang hangin Siangtho Pumpi them khat pen Lenggahzu Hai (Chalice) sungah koih ahi hiam?
Missa Biakpiakna hun sungah Siangtho Pumpi san madeuhin Siampipa in a sep khat ih mu ngei ding hi.
Siampipa in Sacramentu in akikhel ahi, Topa Jesu ii si le sa (Siangtho Pumpi) them khat belnenin leenggahzu hai sungah koih hi.
Tua banga hihna pen “Commingling” (a si le a sa hel na) kici a, tanglai pawlpi ah “Fermentum” ci-in mi tamin thei hi.
Ih et ciangin thu lamdanglua ahih loh hangin Kha thu ah a thuthuk mahmah a deihna om hi.
Bang hang hiam cih leh –
1.Thawhkikna ii lim lahna
Siangtho Pumpi biakapna (Consecration) hunin asi le asa a tuam tuakin ki-ap hi.
Tua in Topa Jesu, Calvary mualtungah a nuntakna apiakkhiat hunin a si le a sa akikhenna ahi, “sihna” pen aki langh dingin hong lak hi.
Ahi zongin Siampipa in a sa them pen asi sungah a koih tak ciangin a si le a sa kigawm kik hi. Tua in thawhkikna ii thuthukna hong lak hi. Eite ii i san Topa in a si hilo hi. Sihna zo in anungta, a tho kik Topa hi cih thu, hih nasepna in dai takin hong tangko ahi hi.
2. Ki thutuahna ii phungpi
Tanglai pawlpi ah hih “Fermentum” pen sepkhiatna cih adeihna om hi.
Siadawte in amaute’ Biakap na Missa pan Siangtho Pumpi a themte pen Parish tuamtuam a om Siampite kiangah puak zel uh hi.
Siampite in Missa a bawl uh ciangin tua Siangtho Pumpi them pen Leenggahzu hai sungah a koihna hangin “eite khempeuhin Upna khat, Pawlpi khat, Biakpiakna khat nuai ah ki pum khatin i om hi” cih lahna hi.
Hih nasepna in tu hunin zong eite in khat guakbek hilo in Topa ii pumpi ahi, Pawlpi innkuan sungah pumkhat in ih om hi cihna hong thei sak hi.
3. Kilemna leh tawntung nuntak nading thungetna
Siampipa in “hih leitung mawhnate a Lakhia Pasian Tuuno…”a cihma in hi nasep a sem hi. Siangtho Pumpi a them neu khat leenggahhai sungah a koih hunin Siampipa in hi bangin dam takin thungen hi. “Eite ii Pasian, Topa Jesu ii silesa kihelnain, asang eite khempeuh tawntung nuntakna hong pia ta hen.”
Hihin kipumkhatna, kilemna leh nuntak tawntungna thupha te ngetna, a kiniamkhiat thungetna ahi hi.
Hih nasepna in bang deihna hiam?
Topa Jesu in sihna thuak takpi a, zong tho kik takpi ahihna tangko hi. Pawlpi pen Upna khat sungah hong kigawmsak hi.
Kilemna le hotkhiatna hong puak, anungta Topa san nading in eite lungtang hong puahphat sak hi. Tua ahih manin Siampipa in Siangtho Pumpi them pen Chalice sungah akoih na muh ciangin, hih in nuntakna thu atangko hi, kipumkhatna ii phungpi hi, kilemna ii thungetna hi a, hotkhiatna ii thuthukna hi cih phawkin.
