Misiangtho Irenaeus Pawini. (June – 28)
Lyons khua Siadaw Irenaeus in AD-130 kum in Asia Minor ah suak hi. A mah pen Merana khua Siadaw Polycarp ii nungzui leh St. John ii nungzui khat ahi hi. AD-177 kum in Piantit gam ah Pawlpi ki bawlsia mahmah a, Lyons khua’ Siadaw zong ki that hi.
Tua lai takin Irenaeus Rome ah apai tawh ki tuak ahih manin sihna pan suakta hi. A mah a ciah kik ciang in Pawlpi a ki bawlsiatna veng ta a, Lyons khuamite thukimna tawh Irenaeus Siadaw za ki pia hi. Amah in a tuu cing vaipuak hoihtak in sem bek tham lo, ki nai pih gam te ah zong pai in Pasian thu tangko ding hanciam hi.
Irenaeus cih min pen Greek kam in “ki lemna siapi” cih khiatna nei in, a min tawh ki tuak in kitot ki sel na, ki lungkim lohnate ah hoihtak in lemtuah thei hi. Ka mit tang tawh ka muh ciangbek in um ning aci mi te, Irenaeus in thu tangkona leh lai at na tawh na langpang hi. “Pasian um lo te langpangna, Nungzuipi te hilh thu te’ teci” cih laibu sungah aman ciamnuih hel in siang takin Catholic pawlpi’ upna na kem cing hi. AD-202 kum, Pawlpi a ki bawlsiat hunin Irenaeus in thatna thuak hi.
Misiangtho Irenaeus aw…kote adingin thu hong ngetsak tan.
