Misiangtho Stephen in AD 969 kumin Hungary gam, Gran khua ah suak hi. Stephen cih min angah na in Hungary gam auk kumpi pen Pasian um lo khat ahi hi. Ahi zongin kumpi Stephen ii zi in zan mang khat hong nei hi. Tua amang sungah Misiangtho Stephen in hong suak ding na tapa in missionary khat hong hi ding hi ci-in kumpinu kiangah gen hi. Tua amang hangin kumpipa te nupa ki thu kim in Christian suakin tuisawpna sang uh hi.
Nau a suah ciangin amang sungah thu hong gen Misiangtho Stephen min la-in a tapa min Stephen ci-in phuak uh hi. Stephen in a Pa kiang pan upna gamh ngahin a pa tawh biakinn te, zateih sang te lam uh hi. Tua ban ah gam mi te in Pasian thu a theih sem sem nang uh leh Pasian a up na ding uh ngim na tawh Siampi te sam in ki piakhia sak hi.
Christian te ading in thukhun te bawlsak in amah kumpi za a piak na dingin Stephen in Pope kiangah ngen hi. Pope Syvester II in zong Stephen ii nasepna te thupi sa ahih manin kumpi za piak ding thukim hi. Stephen kumpi a suah ciangin Pasian a umlo pawl te susia in Christian te leh Pasian um lo te ki teenna te kham hi. Gam mi te tungah hehpihna tawh uk in mi zawngte huhin a dam lo mite cingin kem hi.
Stephen in Pasian thu a hanciam mahmah Roma kumpi Hanry II ii nau nu tawh ki teengin tapa nih nei uh hi. A tapa lian pen a neu tung in si ahih manin a tapa nih na Emeric pen a gamh, a za luah sak ding a ngaihsut hangin nikhat, a tapa gam sungah sabeng dingin a pai na pan gamsa te thatlupna thuak in si hi.
Kumpi Stephen in na sa mah mahin a khasiat mah mah hangin a tapa ii Pasian a itna te ngaihsun in Pasian ang sungah tung ding hi ci-in a hoih lamin la-in amah leh amah ki hehnem hi. Tua banah Kumpi Stephen in Pasian in a mah it ahih manin sam baih hi ci hi. Stephen in a dam loh hun nangawn in Catholic Pawlpi kepcing nading gen bel in nei-in Tonu tungah Pawlpi ap hi. Pawlpi a ap bek hilo in Pawlpi a uk te Tonu in a huh a panpih nading leh a gam mite mah mah zong Tonu tungah ap hi.
A nunung ciangin ama kha a cing a kep na dingin le lungnopna a ngah na dingin Tonu tungah amah le amah ki-ap in 1038 kum in si hi. A sawt ciangin Pawlpi in Kumpi Stephen leh a tapa Emeric te Misiangtho in pahtawina pia hi.
Misiangtho Stephen aw….Ko te adingin thu hong ngetsak in.