Matthew 20: 1-16

1. “Bang hang hiam cih leh vantung gam in a leenggah huan ah nasem ding mi a cial dingin zing tungin a kuankhia huanneipa tawh kibang hi.
2. Amah in nasem dingte tawh ni khatin dangka san peek khat(a) thalawh dingin a kithukim khit uh ciangin amaute a leenggah huan ah a kuansak hi.
3. Zingsang nai kua pawlin amah paikhia a, vanzuakna mun ah bangmah sem loin ading mi pawlkhat a mu hi.
4. Amaute’ kiangah, ‘No zong pai unla, ka leenggah huan ah va kuan un; a kilawmzah thaman kong pia ding hi,’ a cih ciangin amaute a kuan uh hi.
5. Sun hun pawl le nitak nai thum pawlin amah paikhia leuleu a, tua mah bangin a cial hi.
6. Nitak nai nga pawlin amah paikhiakikin nasem lo-a a mawk din mi pawlkhat mu a, ‘Bang hangin sun thapai bangmah sem loin hih lai-ah mawk din na hi uh hiam?’ a ci hi.
7. Amaute in, ‘Kuamah in ko hong cial lo hi,’ ci-in a dawng uh hi. Amah in amaute’ kiangah, ‘No zong ka leenggah huan ah va kuan un,’ ci-in a cial hi.
8. Nitak hong tun ciangin loneipa in sumkempa’ kiangah, ‘Nasemte sam inla, a kuan nunungte a kipanin a kuan masate dongin a nitha uh pia in,’ a ci hi.
9. Nai nga pawl-a kicial nasemte hong pai uh a, khatciat in dangka san peek khatciat a ngah hi.
10. Tu-in a kuan masate hong pai uh a, a tamzaw a ngah dingin a kilamen uh hi. Ahi zongin dangka san peek khat bek mah a ngah uh hi.
11. A nasep thaman uh a san uh ciangin loneipa’ tungah lungkim loin a phun uh hi.
12. Amaute in, ‘Hong kuan nunungte in nai khat sung bek sem napi-in nisa thuakin gimpi tawlpi-a sun thapaai a sem kote tawh na kikimsak hi,’ a ci uh hi.
13. Ahi zongin loneipa in amaute’ laka mi khat kiangah, ‘Lawm aw, keimah in na tungah a thuman loin ka gamtatna omlo hi. Nangmah in dangka san peek khat thalawh dingin kei tawh a kithukimsa hilo na hi hiam?
14. Hih na thalawhsa sum la inla, paikhia in. Ka cial nunung pente zong nang kong piakzah mah ka pia nuam hi.
15. Keima sum ka ut bangin ka zat theih ding hilo ahi hiam? Tua ahih kei leh ka citnate’ hangin hazatna nei na hi hiam?’ a ci hi.
16. Tua ahih manin a nunungte masa dinga, a masate nunung ding hi,” a ci hi.

Hi in Topa’ Lungdamna Laisiangtho ahi hi.