Matthew 23: 23-26

23. “Mi hoih a kineih no lai siangtho siamte le Pharisee-te aw, gimna na thuak ding uh hi! Bang hang hiam cih leh, lenmui, lothaang, le nanan-te, sawm ah khat na piak uh hangin, thukham sungah a thupi zaw ahi thuman thutanna, hehpihna, upna thute na thudon kei uh hi. A dangte thudon loin om tuan loin, hihte zong na zuih ding uh ahi hi.
24. No mittaw lam hilhte aw! Note in thovai om lohna dingin tui na khaih uh hangin, kalaohte na nawmvalh uh hi!
25. “Mi hoih a kineih no lai siangtho siamte le Pharisee-te aw, gimna na thuak ding uh hi! Bang hang hiam cih leh, note in hai le kuangte a puatham na silsiang uh hangin, a sung lam duhgawhna le huaihamnate tawh a kidim hi.
26. Mittaw Pharisee-te aw, hai le kuang a sianna dingin a sung lam silsiang masa un, tua hi leh a pualam zong siang thei ding hi!

Hi in Topa’ Lungdamna Laisiangtho ahi hi.