Misiangtho Felix Pawini.(August – 30)

Mi siangtho Felix in Roma Siadaw khat ahi hi. Felix cih min ii a khiatna in “the happy one”, ‘a nuam den pa’ cihna hi. Felix pen Pasian tung ah a upna khah suah vetlo a, ama upna a sih pih khat ahi hi. Diocletian bawlsiatna sung ah simmawh genthei a thuak kha, a nuntakna a pia mi siangtho ci’n ki ciamteh hi. Bawlsiat mai mai hilo a, Pasian’ ading ngawng tan na thuak hi.
Felix a ki thah nading mun lam a zuatna ah, a en te lak pan mi khat, nakpi tak in a lungsim sukha in, “kei zong hih mi pa’ pulak, a teci pan Jesu Christu a um mi khat ka hi hi. Kei zong a mah tawh ka si khawm nuam hi. Hong man un,” ci’n a lamdang pi khat in Pasian aading a nuntakna a pia ngam khat na om hi. Tua ciangin thu khen ding te’n amah zong man a, AD 274 kumin, a nih un ngawng tanna ki zom in thahna thuak uh hi.
Tangthu kan te gen bang leh, Ostain lam, Commodilla han ah amautegel ki vui a, Pope Saint Damasus hun ciang, a han uh puah kik in, han mual suang a thak bawl sak kik uh hi. Pope St. Siricius hun ciangin han mual suang na behlap leuleu hi. Pope Leo III in Rome khua, amautegel ki vui na St. Paul Basilica gei a, Commodilla han tung ah, amaute phawkna biakinn khat lam hi.
1905 kum in a han uh ki to kik in, han mual tungah, “Felix (a nuam den pa) ci a, man tak leh kho tak a, min ki phuak pa, Christu aading lawp tak in teci na pang a, vantung gam a zong pa na hi hi. Nang in leitung kumpi te lang pangin, lungkia sak liang in na upna pelem hetlo in, pulakkhia a na nuntakna a pia pa hi teh. Tuamah bang in a min a ki thei lo, nang tawh a si khawm ih sanggampa zong a upna in vantung gam ah tun khin zo hi” ci’n ki gelh hi.
Misiangtho Felix aw…kote adingin thu hong ngetsak in.