NUNGAK SIANGTHO TE TAWH NA KIMUH CIANGIN
*****
Lungsim khempeuh tawh Pasian it in, kiim le paam a om mite Topa Jesu itna tawh itna in Catholic nungak siangtho te nuntakna ii bulpi hi.
Catholic nungak siangtho khat ii nuntakna in apuatham muhna ah a simple mahmah hangin, a sungtawngah thungetna, kipiakkhiatna le Pasian na sepnate tawh a kidim nuntakna hi.
Nisim kalsuanna te Pasian tungah ap in thungetna tawh kipan hi. Zingsang thungetna, Missa sungah kihelna, Laisiangtho simna leh dai takin Pasian tawh hun beisakna te in Catholic nungak siangtho te’ nisim nuntakna ah a thupi pen te ahi hi.
Catholic nungak siangtho te in amau kipawlna ciat pan amaute a kipia vaipuakte sem ciat uh hi. Pawlkhatte in sanginn te ah lai hilhin, pawlkhat te zato ah cinate kem uh hi. Pawlkhat in tagah naupangte, piteek puteek te, mizawng daipaamte leh huh ding akisam mite huhin panpih uh hi. Pawlkhat leuleu mission nasep sem in, kha thu lam ah makaihna te tawh Pawlpi ii a tuamtuam nasepte sem uh hi.
Catholic nungak siangtho te in zawngkhalna (Poverty), siangtho na (Chastity) le thu mangna (Obedience) cih kiciamna thum te tawh nungta uh a, amau nuntakna khempueh pen Topa Jesu le Pawlpi aading in a kipiate ahi uh hi.
Catholic nungak siangtho te zahtakna in “Sister” ci-in kisam hi. Amaute in Pasian tungah akipiakhia te ahih amanun, a om zia, hekzia te siam uh hi.
Tua ahih manin amaute tawh na kimuh ciangin mimal vai leh nungak siangtho te thukhunte zahtak ding kisam hi.
Catholic nungak siangtho te in midangte sangin apicing zaw te ci-in ciamteh lo-in, Topa Jesu ii itna te a serve Sister te hihna tawh zahtak ding kisam hi.
Nungak siangtho te in akicing mite hilo a, Pasian thupha, Pasian hehpihna muangin siangtho na ah hanciamin nisim a kalsuante ahi uh hi. Tua ahih manin amaute adingin thungetsakna leh amaute Pasian nasepna te thupitsakna, thapiakna te in Catholic thuzui mite khempeuh ii bawl zawh ding amanpha itna khat ahi hi.
“Topa aw, nang tungah hong ki-ap in anungta ahi, nungak siangtho te khempeuh na thupha tawh atawntungin tha na piaksak ta in. Amaute ii thungetna leh Pasian na sepna te tungtawnin mitampite in nangma itna mu ta uh hen. Amen.”
