Misiangtho Martin De Porres Pawini. (November – 3)
Mihing khat i manphatna pen ama neihlelamh, minlevang, mel le sa te tawh ki teh thei lo hi. Pasian mai ah mi khat ii manphatna pen ama lungtang sunga itna, kiniamkhiatna leh nahoih sepnate tungah ki mu thei hi.
Hi a tunga thu te tawh ama nuntakna alakkhiat khat in Misiangtho Martin de Porres ahi hi. Amah pen Dominican kipawlna sungpan khat hi a, mizawngte, cinate leh huhna akisam mite tungah itna tawh huhna apia, apanpih Misiangtho khat ahi hi.
Misiangtho Martin de Porres in 1579 kum, December 9 ni-in, Peru gam, Lima khua ah suak hi. A pa pen Spain minam hi in, a Nu Ana Velasquez in Afarica minam khat ahi hi.
Ama neu hunin nopsakna tawh kidim nuntakna hilo hi. Zawngkhalna le minam deidanna cihte zong a thuak kha khat ahi hi. Apa tawh amau innkuan kikhen uh ahih manin a Nu in ata te haksatna tampi kawmkal ah makaih in lamlak hi.
Martin de Porres in kum (12) aphak hunin sam met sia khat kiangah nasep kisinin sam metna, liammate bawlna le cinate huhna te sin hi.
Aneutung panin gentheih haksatna te a thuak hangin ama lungtang kisia cih omlo in, midangte ii haksatna te theihsiam zaw hi.
Dominican kipawlna ah lutna
Martin in ama nuntakna pen Pasian aadingin piakkhiat nopna lungsim nei hi. Tua ahih manin Lima khua aom, Dominican Siampi sang ah lutin nasem hi.
Amasa lamin minam vai le vai tuamtuam te hangin kipawlna sungah lut theihna phal ngah lo in ahuh ding bekin sang uh hi.
Amah in Siampi sangah innpuah, puansawp, inntaih, munphiat cih nasepte leh midangte huhna te cihtakna tawh sem hi. Kum (8) bang asawt khit ciangin Dominican kipawlna sungah lut theihna phalna ngah hi. Amah in Siampi khat ahih loh hangin ama vaipuakte athem aneng nangawn Pasian aading in a sem khat ahi hi.
Mizawngte leh cinate aading in a nuntakna
Martin in Siampi sang sung aom cina te khoi in apua lam aom mizawng te zong ahih zawh zahin huh hi. Ama aading in mikhat ii mel le vang, minam, neih le lamh cih te thupi lo hi. Huhna akisam mite khempeuhin hehpihna piak ding mihing vive ahi hi.
Amah in mizawngte aading nek le dawn, silh le ten leh zatui te angah nading un ahanciam banah tagah naupangte le dammawh mite zong don in khoi hi.
Ama hehpihna in mihingte tung bekah kinga lo hi. Ganhing te tungah zong hehpihna nei hi. Tua ahih manin ama lim akisuaih ciangin Ui, Zawhngeu le Zusa cih te ki mu thei hi.
Martin de Porre pen mi pawlkhat in “Saint of the Broom” (munphiah misiangtho) ci-in zong sam uh hi. Ahangin amah in inn puah, inn taih, munphiat cih bangin aneu pen nasepte nangawn kiniamkhiatna tawh a sep man ahi hi.
Ama khut sung aom munphiahin aki thupi muhlo nasep neu pen te nangawn itna tawh kisem zo hi cih lahna lim khat hong suak hi.
Ama nuntakna in siangthona cihin min le vang, gualzawhna le mite pahtawina te sungah a om hilo hi cih eite hong lak hi. Ei i nisim nasep vaipuakte Pasian aadingin cihtakna tawh sepna sungah zong siangthona om hi.
Martin de Porres in 1639 kum, November 3 ni-in, Peru gam, Lima khua ah si hi. Ama kiniamkhiatna, thungetna le mizawngte tungah a koih itna te hangin mi tampi te ii itna leh zahtakna ngah hi. 1962 kum, May 6 ni-in Pope St. John XXIII in Misiangtho suahna tangko hi.
Misiangtho Martin de Porres ii nuntakna in eite hong dot thu khat om hi.
“Pasian it ing a ci eite in i kiim i paam aom huhna akisam mite tungah itna i lak zo takpi hiam?”
Misiangtho suah nading cihin mite pahtawina ngah nading hilo hi. Ei ii nisim nuntakna ah Topa ii itna i lahkhiat ding ahi hi.
Misiangtho Martin de Porres aw….kote ading in thu hong ngetsak tan.
