Misiangtho Leo the Great Pawini. (November – 10)

Pope Leo I na in, AD-400 kumin, Roma Empire, Tuscany khua-ah suak hi. Ama pilna, cimna le siamna hangin Siampi Ordination angah khit ciangin alian bel Siampipa ii Sacretry sem a, Pope Sixtus III na asih ciangin Pope dingin teelna ngah hi. Pope Leo in Pope te phualpi ahi, Vatican pen khangto sak mahmah hi. AD-451 kum, (Ecumenical Council of Chalcedon) Chalcedon thukikupna ah, Topa Jesu ii Pasian hihna leh mihing hihna thu kipsak hi. Tua thu Pope tangmi (Delegate) te leh Siadawte in zong “Petru in Leo tungtawnin thugen ta hi” ci-in thukimin kipsak uh hi.
AD – 452 kumin, Pasian’ ciingkhau ci-in aminthang Attila in Roma do dingin agalkap te tawh gal akuan ciangin mipite lauin liing uh a, Rome galkap tampite in amau nasep leh azaliatna uh taisan uh hi. Tua ciangin Pope Leo in Roma ah gal sim dingin gal akuan te Singlamteh khat tawi-in maingat a, Attila zong ama gamah ciah sak kik zo hi. Attila in St. Petru leh St. Paul te in leitung aom Pawlpi pen vantung pan dal in Pope Leo nunglam pan galte ado na thu amuh ciangin alungsim kikhel hi ci-in kigen hi.
Pope Leo in khat vei ama mawhna te maisakna angah na dingin St. Petru hanah ni (40) sung pai-in thungen hi. Tua ciangin Misiangtho ama kiangah kilangin “Siampi suahna Ordination piakna ah na khialh mawhna sim loh, Pasian hangin namawhnate hongkimaisak zo hi” ci hi.
Tua pankipan Siampi suahna Ordination pen akumcingin apicing khin leh hoihtakin aki sittel khin, Siampi sin sangnaupangte bek Ordination piak dingin khentat hi. AD 461 kum, November ni 10 ni-in Pope Leo si hi. Ama vangil hoih (ဓာတ်တော်မွေတော်) te Vatican biak innpi ah tu dongin kikem hi.
Misiangtho Leo the Great aw….kote aadingin thu hong ngetsak tan.