Milim or lim tawh kisai theih huai thu
Dotna: Father aw, Solomon lam, Pasian biak inn pi sung ah milim or lim tawh kisai nate a om hiam?
Dawng na: 1. Oliv sing tawh akibawl, pi sawm le nga tuak asang Kherub (Vantung mi) lim nih om hi.
- Nisuh kungte le pakpalhte abawl hi. (Kumpi masate 6: 23-29) hun na ngah leh 6: 23-38 dong sim in.
- Biakinn sunglam kawmte pen kongkhak zang ciang dong lim kibawlte tawh kidima, nisuh kungte le kherub limte vive ahihi. A masa in nisuh kung, tua ciangin Kherub, nisuh kung, Kherub cih bangin a kimkot khempeuh kihelhto dimdiam hi. Tua Kherub te in maitang nih ciat nei uh hi. (Ezekiel 41:17-26) ciang sim un.
- Topa tawh akiho dingin kikhopna buk sungah Moses a pai ciangin, Kherub nih te kikal, thuciamna singkuang tungah a om hehpihna tokhom tung san teng panin amah a hopih awging khat om a, tua awging in Moses a hopih hi. (Gam lak vakna 7:89).
- Nangmah in kham tawh Kherub nih na bawl ding a, hehpihna tokhom mong tuakah a kiseek tua Kherub te na om sak ding hi. (Paikhiatna 25:18-22 ) ciang sim suak in.
*Theih ding: Hi limte akibia hi lo hi. Catholic ten zong Biakinn sung ah Topa Jesu singlamteh tung ah aki khai nate, Misiangtho te i limte, hi dan mah in ki koih hi, aki bia hi lo hi. Catholic te i “Upna kiciam na” a thei lo ten Milim bia te ci-in hong ko ko uh hi.
Worship leh veneration ki bang lo.
Worship leh kneeling and bowing ki bang lo, cih te i theih ding kisam masa hi.
Eima pawlpi ciat i up dan leh ngeina dan mah in pai ciat ni. Ei kiang ah thu hoih leh thu manpha i neih le mithu khawng ki gen man lo ding hi. Mi pawlpi thu agengen te in, ama pawlpi thu agen ding thu hoih aneih loh man le aom loh man i zaw hi.
+Christu sung ah itna tawh!
By Fr. Paulinus
