Mawhna pelh theih nading lampite
Mawhna pelh nading in pilvang takin hanciamna a kisap mah bangin Pasian thupha muangin ama deihna bangin nuntak ding zong kisam hi.
Mawhna pelh zawh nading lampite tawh a siangtho Christian nuntakna ih pom zawh nading in hanciam ciatni.
- Thungen in
Lungsim pumpi tawh thungen in. Thungetna in mawhna pelh nading abulpi hi. Thungetna pan Pasian tawh ki zop tawntung na in ze-etna te thuakzawh nading thupha hong ngahsak hi.
- Sacramentu te sang zel zel in
Siangtho Pumpi sanna leh mawh sutna Sacramentu te in ih Kha tha hong hat sakin mawhna ii natna te hong damsak banah mawhna pelh zawh nading tha hong hat sak hi.
- Na pumpi zahtak in.
Na pumpi in Kha Siangtho Pasian a om na biakinn, Pasian lim leh mel tawh kisun in hong ki bawl ahihna phawk denin siangtho takin koih in. Biakinn a ninsak na khempeuh pelh ding kisam hi.
- Laisiangtho sim inla, lungngai in.
Pasian kammal in mawhna pelh nading in lam honglak banah tha zong hong guan hi.
- Tonu tungah zahtakna nei in.
Mawhna pelh nadingin a vanglian pen belh dingin Tonu Maria ii panpihna nget ding ahi hi. Siangthona leh tha ngah na dingin khi khin in Tonu huhna ngen in.
- Hong kem vantungmi beel in.
Nang hong cing hong kemin lam hong lak dingin na vantungmi na kiangah om den hi. Na tha nem simin hong kem vantungmi kiangah thungetna ngenin amah sam zel in.
- Nang leh nang ki kepna khang sakin.
A neuno te pankipan nang leh nang kikem siamin om in, thadahna te tawh hun bei sak lohding kisam hi. A hoihlo ngaihsutna, lunggulhnate na lungsim ah hong suah sialin lungsim sungpan paihkhiatpah theihna ngeina neih ding kisam hi. Nang leh nang na ki kep zawh nadingin nang ii zuih ding thu khun neih ding, ciapteh ding kisam hi.
- Hoihna phatna bawl theihna lawm hoih koih in.
A siangtho, a manpha nuntakna tawh nuntak kalsuan zawh nading in nam tuamtuam tawh hong panpih, hong huh ding lawm leh gual te teelin ki kolhpih in. A hoihlo gamtatna leh mawhna bawl nading hong hanthawn thei mite pelh in.
- Antanna tawh nang leh nang ki nial zo in.
Antanna (or) kideekna in na lunggulhna te hong zo sakin mawhna te nial zawh nang thakhauhna hong pia hi.
- Ki sittel den in.
Ni khat khat vei, ahih kei leh kaal khat khat vei, na lungsim tawng sit in. Tua ciangin nang ii ngaihsutna leh sepkhiatna te tungah hong pilvang sakin mawhna te hong pelh zo sak ding hi.
