Gentheih haksatnate tawh kituah hun ciang, Tonu hong vaikhak kammal phawkni.

Jn 2: 1-11

Cana khua mopawi ah lengla do nading, leenggahzu bei-in maizumna a thuak kha ding mothakte a thei kha Topa Jesu ii Nu, Tonu Maria in a tapa kiangah pai-in leenggahzu a beina thu gen pah hi.

Tua zawh ciang Tonu in nasemte a vaikhak kammal in a tapa a cihnopna hi-in, “Ama hong sawl bangin sem un” ci hi.

A manpha mahmah vaikhakna kammal hi. Lungmuanna hong pia kammal hi. Thupha hong ngahsak kam vaikhak hi.

Tua hun lai-in mite in Topa Jesu in vangliatna a neihna thu thei lo uh hi. Tonu vaikhakna bek tawh Topa Jesu gen bangin a sem hih tuak uh hi.

Nasemte in bang hong piang ding cih thei lo uh hi.

Leenggahzu beina leh khe sil nading tui kholna beel sungah tui dipding bang kisai hiam cih amaute in thei lo uh hi. A kisawl manin a sem uh hi bek a, ahi zongin amau upmawhloh thu hong piang hi. Leenggahzu beina hangin amaizum ding mothakte adingin tui pan a lim pen leenggahzu in hong ki khelin lungdamna lianpi khat hong suak hi.

Tonu in haksatna a tun ding hun ciangin “bang hangin a kicing ding bawl lo, kua ii vaihawm hi a, bang hangin mi tampi sam sese” cih bangin mite mawhsak ding hun la lo-in a Tapa kiangah pai-in gen pah hi.

Tapa Jesu in zong ama hun a tun nailoh hangin (sep ding vaihawmna a neih nailoh hangin) Tonu ii ngetsakna hangin sep sak hi.

Nasemte in zong bang hong piang ding cih a theih loh uh hangin Topa Jesu sawl bangin mangin sem uh ahih manin a hoih pen hong piang hi.

Lungngaih ding

Eite in haksatna tawh ih ki tuah ciangin Topa Jesu hong sawl bangin ih sem hiam? Ei ii ut thu tawh, hoih ding hi cih upmawhna tawh ih sem hiam?

Tonu hong vaikhak thu in-

“Ama hong sawl bangin sem un” ci hi.

Bang hong piang ding cih i tel loh hangin amah (Tapa) hong sawl bangin sem lehang a hoih pen result i ngah ding hi. Khat leh khat kimawhsak kawmin hoih dinga upmawh thu bek tawh sem lehang haksa zaw thei ding hi. Supna tamzaw thei ding hi.