To understand what life is, you have to visit three locations!
Leitung nuntakna bang hiam cih tel tak in i theih nading, i hawh nading ahoih mun thum te
1: The hospital = Zato
Zato inn paina hang in, cidamna in bang zatak in manpha hiam cih na thei ding hi.
2: The prison = Thonginn
Thonginn na hawhna hang in, mikhat i suahtakna (freedom) bang zahin manpha cih na mu ding hi.
3: The cemetary= Hanmual; hanmun
Hanmual na pai na hang in, leitung nuntakna pen bang mah ahih lo lam na phawk kha ding hi. Ahang in, tuni i khe tawh i sik, i tuancil leitang pen i innkhumvum hong suak hi cih na tel kha ding hi.
Thu ngaihsut ding
+Tua hang in, leitung ah i nuntak sung in, kiniamkhiat in, Pasian it in, Pasian um in, Pasian deihna bang nungta ciat ni. Mi khat le khat zong mihing in ki mu ciat ni. Khat le khat ki it in, zahtakna ki pia ciat ni. Pawlpi ki deidan na lungsim te nusia ni. Minam khat le khat kisim mawh nate kineu et nate paai ciat ni. Beh le phung lungsim te avalpi in nei kei ni. Pau le ham i kibat loh nate hang in, gal le sa in ki mu nawn kei ni.
Lai Siangtho:
John 13:34-35 ” Note tungah ka hong piak thak thu in: Note khat le khat na ki- it ding uh ahi hi. Note ka hong it mah bangin note khatlekhat na ki-it un. Note khatlekhat ki-it le uhcin keima nungzuite na hihna uh mi khempeuh in hong thei ding uh hi.”
Mark 12:29-31 “Jesu in, thukham a lianpen in: Israel mite aw, ngai un: I Topa Pasian bek mah Topa ahi hi. Na Topa Pasian uh, na lungsim khempeuh, na nuntakna khempeuh, na pilna khempeuh, le na thahatna khempeuh uh tawh na it un, acih na ahi hi. Anihna in: Nangma pumpi na it bangin na vengte na it in, cihna ahi hi. Hih tegel sangin thukham a lianzaw adang om nawn lo hi, ci- in a dawng hi.”
Galatians 3:28 “Tua ahih manin Jew mi le Gentail mi, sila le sila ahi lo, numei le pasal cih bangin kideidanna om nawn lo a, note khempeuh Christu tawh na kipawlna hangun pawlkhat hi in, a kibangkim na hi uh hi.”
Pasian tate i Pa Pasian nasep na ah, leitung lungsim masuan lo-in Kha lungsim masuan te i suak zawh nading eite khat ciat tung ah, Pasian in thupha hong pia ta hen.
“We all are one in Christ”
By Fr. Paulinus
