A (8) Veina Phai, Siangtho Lungtang Parish, Tuivial Khua (12-17.3.2025)

Phai, Siangtho Lungtang Parish acing akem Rev. Fr. Damian Zam Sian Dal ii vaihawm siamna tawh Tuivial Khua ah Phai Parish Nupite A (8) Veina Parish bup Pasian thu sinna Tuivial khua ah March 12 pan 17 ni dong nasia takin kibawl hi.
Tua sungah Rev. Fr. Damian Dal in Biakpiakna thu, Rev. Fr. Joseph Zo Mung in Sacramentu te thu leh Bro. Joseph Khai in Laisiangtho Sunga Nupi Hoih te thu cih bangin ni thum sung hilhcianna nei uh hi.
Nipi ni Kikhop man teh dotna leh dawnna hun nasia takin bawlin Nupite in zong tha ngah thei mahmah uh hi.
Tua khitteh Nupi tengin thukikupna hun khat nei-in maikum ciang a bawl na ding mun zong khensatna nei pah uh hi.
Maikum ciang Nupite Thu sinna leh Pawi bawl na ding zong a neih bang bang uh upna kamciam ki bawlin nekledawn ding tampitak mah kamciam ngah khin uh a hih manin tha ngah huai mahmah hi.
Tintan hunsung teng Pasian thu sin inntek khua nupite tawh vekpi gawm (150) kim pha den uh hi. Nutak sim in lenkhopna ki bawlin a khua khua pan Nupite Labu sung la nambat (296) ki demna leh Laisiangtho lotna action tawh kidemna cih te zong bawl uh hi.
A thangah huai pha diak khat ah kum (60) tungsiah a pha tintan a kah Nupi (20) kim bang pha in etteh huai mahmah uh hi. Tua te zong a Parish mintawh Pahtawina letsong piakna ki nei hi.
Hi bangin ih Pawlpi sungah Nupite mahmah in tha hong ngah uh a hih manin lungdam huai mahmah hi.
Nupi tengin Pasian thu a sin theih na dingun Tuivial khua Papi teng in an huan sak in khangno teng in Tintan man ciang nek theih pah lian dingin an thuksa in koih sak sitset uh a hih manun tintan hun sung pen hun man thei mahmah uh hi.