Catholic Nisim Lungdamna Laisiangtho. Easter Friday 25.4.2025 (Fri)
John 21:1-14
- Tua khit ciangin Tiberias bual gei-a a nungzuipite’ kiangah Jesu a kilangkik hi. Amah hih bangin hong kilang hi.
- Simon Peter, Didymus kici Thomas, Galilee gam Cana khua mi Nathanael, Zebedee’ tapate le adang nungzuipi nihte a om uh hi.
- Simon Peter in amaute’ kiangah, “Kei nga beng dingin ka kuan ding hi,” a cih leh amaute in, “Ko zong kong zui ding uh hi,” a ci uh hi. Tua ciangin amaute paikhia-in gunkuang sungah a tuang uh hi. Ahi zongin tua zan tawntung bangmah a man kei uh hi.
- Zingsang tungin gun gei-ah Jesu dinga, ahi zongin nungzuipite in Jesu ahih lam a thei kei uh hi.
- Tua ciangin Jesu in amaute’ kiangah, “Ka tate aw, ngasa khat beek nei lo na hi uh hiam? aci hi. Amaute in Jesu’ kiangah, “Ka nei kei uh hi,”ci-in a dawng uh hi.
- Jesu in amaute’ kiangah, “Gunkuang taklam ah na ngeen uh pai un. Tua hi leh ngasa na man ding uh hi,” a ci hi. Tua bangin amaute in ngeen a paih uh leh, ngasa tampi awk ahih manin, ngeen a kaito zo kei uh hi.
- Tua ciangin Jesu’ it nungzuipipa in Peter’ kiangah, “Topa ahi hi,” a ci hi. “Topa hi,” a cih Simon Peter in a zak ciangin a puan a silh hi, bang hang hiam cih leh amah guaktangin om a, tui sungah a diangkhia hi.
- Ahi zongin adang nungzuipite in tui gei tawh kigamla lo tong za nih bek kihal ahih manin ngasa a dim ngeen kaikawmin gunkuang a zui uh hi.
- Amaute leilak a tun’ uh ciangin mei-am le a tungah ngasa kihang le khomun a mu uh hi.
- Jesu in amaute’ kiangah, “Tu-a na ngasa matte uh tawm hong la un,” a ci hi.
- Tua ahih manin gunkuang tungah Simon Peter kahto a, ngasa a lian za le sawm nga le thum tawh a dim ngeen leilak ah a kaito hi. Tua zahin a tam hangin ngeen kikek lo hi.
- Jesu in amaute’ kiangah, “Note hong pai unla, zing an ne un,” a ci hi. Tu-in Topa ahih lam a nungzuipite in a theih uh ciangin, “Nang kua na hi hiam?” ci-in kuamah in a dong ngam kei uh hi.
- Jesu hong pai-in, khomun le ngasa la-in amaute a pia hi.
- Hih in, Jesu sihna pan a thawhkik khit a nungzuipite’ kiangah a kilah a thumveina ahi hi.
Hi in Topa’ Lungdamna Laisiangtho ahi hi.
