Pasian’geelna kua in susia thei ahi hiam?

Dawi le mihing akipawl takciangin Pasian’geelna susia thei uhhi.

(i) Pasian in mihingte abawl in thupha tawh hongbawl ahihi. Hi napi in Dawi le mihing hong kipawl ciangin thupha nuntakna pan samsiat nuntakna kingah hi. Dawi (gulpi) le Mihing (Adam le Eve) te kilungtuak in na hongsep uhciangin, Pasian’geelna khempeuh susia dikdek uhhi (Piancil 3:1-14).

(ii) Pasian’geelna pen mihing thubek tawh kisusia zo ngeilo a, Dawi in zong ama thubek tawh susia zo ngeilo hi. Ahi zongin Pasian in mihing te apiansak limin apiaksa letsong lianpen ahi “suahtakna” thupha zangin mihing te in Dawi tawh hong kikop uhciangin Pasian’geelna thupha lampi amaute adingin susia uhhi.

(iii) Pasian’geelna susia hi cihciangin, Pasian cimawhin, tupna tungnawnlo banah, supna baaina thuakhi cihna hilo hi. Pasian’geelna i-sutsiat ciangin eima thupha lampi abei hizaw aa, eimah akisum akina akibei ahihi.

(iv) Suahtakna in mihingte tungah Pasian piak thupha letsong lianpen khat ahihi. Hih suahtakna in “TEELNA” hong neisak den hi. Tua teelna tungtawn in i-ngah thaman kilam dang tawntung hi.

(v) Teelna cihpen abaih hilo hi. A haksa penpen khat ahihi. Teelna lo tawh kinungta theilo hi. Mihing nuntakna mahmah in nisim naisim teelna tawh akinungta ahihi. Teelna hoih i-neihtheih nadingin pilna kisam a, tua pilna in, “Pasian zahtakna (kihtakna) in pilna kipatna hi” (Paunak 9″10) ci ahih manin, teelsiamna kipatna in Pasian zahtakna leh kihtakna tungah kinga hi.

(vi) Pasian zahtakna le kihtakna masuan in teelna anei mite adingin Pasian’geelsakna thupha nuntakna kicing Topa’n pia ding hi.

By Fr. Damian Dal