Adventu
Adventu paakkual leh khuaimeivak thu
Catholic biakinn te leh innkuan kimkhat te in Topa Jesu suahni ngakna Adventu hun sungin Paakkual bawlin tua paakkual pen mangpau in Advent Wreath kici hi. Tua paakkual ii a deihna in mongneilo in abei theilo Pasian itna limlahna ahi hi. Tua Paakkual pen singteh hing ahih kei leh singteh lim a engmel tawh kizem hi. Tua bangin singteh eng tawh a kizepna ii a khiatna (adeihna) in Topa Jesu sungah lametna tawh nuntakna limlahna ahi hi.
Tua Paakkual tungah kuaimeivak tawn li kivak in a laizangah tawn khat kikoih hi. Avekpi in tawn (5) pha aa, tua te sungpan khuaimeivak (4) te in, Christmas tun ma, nipi-ni te ah vak ding hi a, khat pen Christmas ni a vak ding ahi hi. Adventu hun sung aa, aki vak khuaimei te pen adum, asandaang leh akang te tawh kizem hi. Adventu khuaimeivak mel a dum in ki sikkikna lim hong lak hi. A sandaang (ပန်းရောင်) mel in nuamna lim hong lak aa, khuaimei vak akang pen Christmas ni ciangin kivak pan hi.
Adventu ih cih in bang hiam?
Ei Roman Catholic (RC) pawl pi ading hun thupi ahi Adventu (Adventu ii khiat na) tawh kisai kong hawm khia ding uh hi. A thei khin zong tampi om ta leng a thei nai-lo khat leh nih ading in mukha in atheih nading uh lung gulhna ahi hi.
Advent pen mang pau hi-in Latin pau pan in hong pai hi-a Adventus ki ci hi. Roman Catholic (RC) te i biakna kum sungah Topa Jesu hong suahna Christmas pawi ma-in nipi kaal li sung kigin kholhna hi-in St. Andrew pawi ni November 30 khit ciang in a nai pen Nipi ni pan a kipan a hihi.
Topa Jesu hong pai ta ding hi ci-in Roman Catholic (RC) pawlpite in lawpna tawh hong pai ding Jesu dawn kholhna ahi hi. Laisiangtho zong tua hun sung teng in Topa Jesu hong pai nading Pasian kammal bek kisim hi.
Tua Advent hun pen mangkang gam ah AD 500 ma in kibawl in AD 600 kiim ciangin mangkang gam bup ah kibawl hi. AD 900 kum ciang in Pope Gregory I na in Adventu nipi guk pan in nipi li bek bawl ding in ciangtan in, tua khit ciang in Christmas pawi bawl dingin tangko khia hi.
Pope Gregory I na in Adventu sungah sim ding Laisiangtho zong teng khia hi. Roman Catholic (RC) pawlpi in Pawlpi sungah, leitung ah Topa Jesu hong om suak hi ci-in Adventu abawl ahi hi. Leitung bei ciang in anih vei na hong pai kik ding Topa Jesu lametna zong hi a, Topa hong pai ta ding hi cih kigin kholh na ahi hi.
