A kephuai leitung pianzia/ kiim le paam
Eite in thu pawlkhatte pen ei tawh kisailo, ei buai ding kisam lo cih bangin ih ngaihsun kha thei a, i kitheihmawh bawl kha thei hi. Tua te sungah leitung pianzia/kiim le paam kepcingna dingin pawlpi pan ahi a, kipawlna pawlkhat te pan ahi zongin hong hanthotna te ih ki theihmawh bawlna in alungkhamhuai thu khat ahi hi. Tua banga kitheihmawh bawlna in alungkhamhuai mahmah thu khat hi gige hi.
Ei ii kiim le paam kepcingna ding ei hih zawhna ciangpan huhin panpihna ahi zongin, awlmawh lohna pan akingah siatnate in ki tel muh lo ahih manin phattuamna bangmah omlo bangin a kimu kha dan ahi hi. Nisim nuntakna ah mitmuhna le upmawhna ki khial kha thei hi. Eite’ sepkhiatna a lian aneu te khempeuhin a kilanghin muhkhiatna a om loh hangin tua pan akingah phattuamnate in tawm tuanlo hi. Tua ahih manin eite in kiim le paam kepcing nading thu vaihawmna pen i thupitsak vaihawmna tuamtuam te sungpan hepkhiat huai lo hi. Ih nuntak zawh nadingin eite in a tawntung in leitang (amah) ih beel hi. A nasia lua lo khuahun kisiatna te nangawnin eite ii sepna bawlna pawl khat te ah hong nawngkaisak thei ahih na thu ih theih tek ahi hi. Kiim le paam pan apiang thu te in a tawm a tam in eite khat ciat hong sukha hi. Tua ahih manin eite in leitung, kiim le paam pan hong kipia nate it-in thupitsak ding ahi hi.
Zingsang ankuang umna khat bek nangawn zong en thei lehang lungnophuai mahmah hi. Ngaihsut theihna lungsim nei mikhat i hih le Nu leitang tungah itna, lungdamna cih lungsimte atawm atam ki nei tek ding pelmawh hi. Buh, mehteh mehgah, sa, ngasa banah annek sabuai tunga om khutnulna Titsue cih bangin a kisim zolo na tampi om hi. Hi nate in ei ii khua-ul luang lianga i sepna tawh i laih/ lei himahtale amawkna in hong piakhia pen leitang, ahi hi. Thupi sakin, na khempeuh cilzatin dop bawl in.
Kiim le paam kepcing na ah ih kihelna, ih huh ih panpihna amasa penin na khempeuh cil zatna hi. Naupangnote zong kiim le paam a it theih nading uh, na khempeuh a cilzat theih nading uh hilh un, sinsak un.
Tua ahih manin tui pen cil zat in. A kisam zah valin zang kei in. Tui hai khat bek a kisam nading mun ah tui bung khat zat khak loh nading ngaihsun in. Tui dawn ciangin zong hai lang bek dawnzawh ding pen hai khat bang suakin a valte a bua ziau thei naupangte zong damtakin genpih in/ hilhin. Naupangte in kiim le paam a it theih nading, na khempeuh a cil zat theih nading hilh in.
Laibu te nazat ciangin zong apat pan atawp dong mun awng omsak lo-in zangin. A kisam lopi in laidal print kei-in. Lai na print ciangin zong na khialh khak loh nading hoihtakin sit photin. Lai dal sia, lai dal mawkval a om loh nading in lim tak mahin ngaihsun in bawl in. Lai dal, laibu te in Gua kung pan hong piang ahih lam phawkin. Tua mah bangin khutnulna titsu te zong akisam zah sang a val zaw in zangh kei in. Akisam zah cianga zatna in singkungte itna hi. Kiim le paam kepcing na zong suakpah hi.
An le tui te na huan ciangin na khamzah ciang ding bek huanin, kham val in mawk buak dingin an tampi huan kei-in. Lam pai kawmin singteh, paakteh te a lo kha thei, singhiang khawng a kuai kha thei khat na hih le ki puahpha in. Singkung, a kung khempeuh in mihingte phattuamna a piak uh banah ih diik huih zong hong pia ahih lam phawk in.
Nikten puansilh te zong hoihtakin kep siam, zat siam in. Hi bang te in haksa hetlo, baih mahmah napi phattuam na hong piapha mahmah hi. Kiim le paam kepcingna a suak banah sum le paai te a mawk bei loh nadingin zong hong huh hi. Leitung zong hong hoih zaw semsem ding hi. Leitung pianzia, kiim le paam a it thei, a thupi sak thei leh a kem siam te ih hih zawh nading han ciam ciatni.
