LEITUNG GAMH
Kilemna cihin kiimlepaam kepcingna zong ahi hi. Pasian in leitung akicing takin leh na khempeuhte mihingte adingin letsong in hong pia khin hi. Tua letsong in nasia mahmah ahih manin eite aading, nuntakna nei khempeuh aading leh i tu i ta khangthakte adingin i kepsiam ding kisam pha mahmah hi.
Pasian in ama bawlsa nate ii hoihna mu hi. Hoih zong hoih takpi hi. Tua ahih manin paakte, ganhingte le nuntakna nei khempeuhte zahtak ding kisam hi, kep siam ding kisam hi, a kisam bangin zatna te ah zong lungdam theih ding kisam hi. Mihing tampite tawh akibangin hawmsiamin zat siam ding kisam hi.
Pasian piansak nate thangzatna, suksiatna, nitsaknate in a bawl Pa, a piangsakpa simmawhna tawh ki bang hi. Mihingte tungah thumanlohna tawh mawhna zong ahi hi.
“Eite’ lametna in tu a hong piangthak tu le ta te in kum cing takin a nuntak theih nading uh, amaute’ khe nuai aom lo hingte a sik khak nading uh, huih siangtho a dik khak nading uh, a siangtho tuipi tungah a pai theih anding uh ahi hi.” (Jacques Cousteau)
Pasian piaksa leitung gamh a susia te in ama inn vengte a do do ahi hi. Amau le amau, a sanggam tungah guta buluhin a gamta bang mah ahi hi. Tu le ta khang aading gamh a piak zawhloh banah amah le amah zong aki susia ahi hi. Mihing in hi bangin a nasia mahmah siatnate sem thei hi.
Ama tunga teengte in leitung ninsak uh hi; bang hang hiam cih leh amaute in thukhamte palsatin, ngeina kipte zui lo uh a, tawntung thuciamna peel uh hi. (Is 24: 5)
Mihingte in kilemna, kicinnate tawh nopsakna i ngah nop leh leitungah kilemna, kicinna le nopsakna a om nadingin i sep ding ahi hi. Tua banah Leitung ii tanu/tapa te ahi huih lak vasate, gamlak singkungte, tui sung a ngasate, leilak a om kiakte, gamsung a om ganhingte zong hoihtakin omsak ding ahi hi.
Adang nuntakna nei ganhingte, a nuntak paisuak ciang bekin mihingte nungta paisuak zo ding hi. Tua ahih manin nuntakna nei te khempeuh a cidam nadingin kepcing ding kisam a, tui, huih, leitang cihte zong siangtho takin kepcing ding ahi hi. Kilemna zong a om ding kisam hi. Ih dik huihin a siangtho ding kisam hi. Singkungte zong hong khang ding kisam hi. Tui te in zong a siangtho ding kisam hi.
Tua hi a, Pasian hong piak letsong ahi, leitung le Pasian piansak nate akem siam le a zangh siam te i hih zawh nadingin hanciam ciatni ci-in ki hanthawn phapha hang.
