Misiangtho Mary of Egypt Pawini. (April – 1)

Misiangtho Mary in AD 344 kumin Egypt gam, Province ah suak hi. Amah pen Kum (17) sung, numei paktat khat himah taleh tu in Catholic Pawlpi i Misiangtho khat ahi hi. Mary in kum (12) aphak hunin Alexandria lam ah kituahin ama pumpi kizuak nasep tawh nungta hi.
Nikhat ciangin Jerusalem lamah singlamteh pawi apai ding mihonpi amuh ciangin amah zong bangmah tel lo pi mahin tua mihonte zui hi. Biakinn atun uh ciangin mite hih mah bangin Mary in biakinn sungah lutin thungen in singlamteh zahtakna apiak nop hangin biakinn kongkhah pan amah bang khat peuhpeuhin a dal bangin biakinn sungah lut thei lo hi. Thum vei, Li vei bang ahanciam hangin lut thei tuanlo ahih manin Mary zong biakinn kiu ah tu in a mittui luang gelhgelh hi.
Tua bangin atutna munpan Mary in Tonu lim galmuh a, tua Tonu lim gei ah amah pai in Biakinn sungah lut theih nading huhna ngen hi. Tua banah kiciamna khat zong Tonu tungah pia hi. Tua kiciamna in azenzen in biakinn sungah alut theih le ahoihlo gamtatna, nasepnate le leitung na te ka nusia ding hi ci-in kiciam hi.
Tua bangin anget zawh ciangin Biakinn lamah pai kikin Biakinn sung a lut le nuamtakin lut thei in thungen thei hi. Thunget aman ciang lungnuam takin pusuak kikin Tonu kiangah ama nuntakna ding lam hong lakin ci-in anget ciangin “Mary aw, Jordan gun kaninla tua munah tawlnga in” cih ‘aw’ khat za hi.
Tua ciangin tua munpan paikhia in tua nitak mahin Jordan gun lam manawhin pai hi. Jordan gun atun ciangin tuisawppa John min tawh akilam biakinn ah tui sawpna sacramentu sangin Siangtho Pumpi zong sangpah hi.
A zingciangin gun kanin sehnel gam lamah Pasian thu lungngai dingin pai hi. Kum (47) sung, Pasian thu lungngai in amah bek om hi. Nikhat, Zosimos akici Siampi khat tawh kimu uh a, tua Siampi pa kiangah maikum ciang hong pai kik in maw a cih hangin Siampipa apai kik ciang Mary i luanghawm le lai khat bek mu hi.
Tua lai sungah Mary in AD 421 kum, abeisa kum khat lai-in Siangtho Pumpi sangin tua nitak mahin si hi cih lai le ama luang a vui sak nading ngetna lai kigelh hi. Egypt gam pan Misiangtho Mary pen si le sa ze-etna athuak mite, Vunnatna aneite le siangtho nading ahanciamte belh Misiangtho hi.
Misiangtho Mary aw….kote adingin thu hong ngetsak tan.