ZAN KHUAMIAL HUN
Judahin Topa Jesu taisanin lehhek dingin apaikhiat ciangin apualam khuamial sung bek mahah akalsuan hilo in ama lungtang khuamial sungah alut, akikhumcip ahi hi.
Ataktak in zan khuamial cihin apualam leitung bekah aom hilo in khat vei vei ciang, ei i nuntakna sungah zong hong tung thei hi.
Thuman thei gige napi, khialhna mah i teel khak ciangin nuntakna sungah zan khuamial hong tung hi.
Tampi ngah zawk nading thumanlo pi in i hih khak ciangin, Ei neihsa hilo napi ih lak khak ciangin, Thuman cihtakna sangin maipha zonna maibiakna i teel khak ciangin… hi te in amasa in aneucik bek hi lel e, khat vei sunsun hi i cih hangin ih lungtang sungah damdam in khua hong mialin i phawk khak loh kalin zan khua mial in i nuntakna hong tuamcip hi.
Kizopnate kisia in kimaisak zawhloh hun ciangin nuntakna sungah zan khuamial hong tung hi.
Gamh vai ahi zongin ki telkhialhna hangin akitam innkuante, kizop kiho na aom nawnlo lawmtate, innkhat sungah omkhawm napi aki gamla nupate, liamma a dam nading hanciam lo in kiphatsakna bek ih pom ciangin, lungmuanna piak ding sangin i nawlkhin ciangin, sawt semsem le khuamial zong hong suk semsem hi. Tua sungmah ah zan khuamial in nuntakna sungah hong lut ta hi.
Lamkhialin lametna abei ciangin nuntakna sungah zan khuamial hong tung hi.
Tu hun tu laitakin mitampite in nuntak nadingin hanciam tek hi. Van man khanluatna, nasep kiplohna cih bangin nisim lunggimna hangin, Leitung mun tuamtuam apiang buainate hangin, lunglen khuangaihna, lungkham sinkhamna cih lungsim lam vangikte hangin, “koi ci kalsuan ding thei nawn keng” cih hunte, lungkia thanemna, cih bangin hi bang vangikte in zong zan khuamial hong tun na nam khat mah ahi hi.
Nuntakna sungah hi bang zan khuamial hong tun hun ahi, thuman lohna a om le…khuavak ah hong ciah kik in. Kiphatsakna le hehna a om le kilem kik nadingin amasa pen nakal hong suan in. Gimlua tawllua in na lungkiat le nang bekin pua kei in, Topa Jesu kiangah puakin.
Topa kiang na kihei hunliantek mahin nang i zan khuamial hong vengin hong bei ding hi. Bang hang hiam cih leh “zan khuamial a phelkham, leitung khua vaakin” Topa Jesu mahmah ahih hang hi.
