THUPHA KIPIASA, ALUI/ASIA VANTE KOI CIBANGIN HEMKHIA DING

Khi, Tonu lim (ahihkeile) Pasian lim le Scapular cih te alui/asiat tak ciangin koi ci bangin hih ding hiam cih leh van dangdangte paih ziau bangin pai in susia ziau lo ding hi hang. Tua Pasian lim te, thupha kipiasa vante pen asiangtho ahih manin mawk paih lo ding, zahtakna tawh hoih takin hemkhia ding hi hang.

Pawlpi ngeina ah tua vante hepkhiatna nam (2) om hi.

Mei tawh hal na (A kaang thei vante)

Khi gui, sing tawh kibawl te, Scapular, thungetna bu le Pasian lim te, Singhiang Siangtho Pawini a kizang Singhiang siangtho cih te mei tawh hal ding hi hang.

Tua banga mei hal khit ciangin a vut te pen lei sungah hoihtakin zahtakna tawh phum ding hi hang.

Lei sungah phumna (A kaang thei lo vante)

Akisia khi thungetnate, Singlamtehte, Tonu lim medalte, lim tuamtuamte pen lei sungah hoih tak phum ding hi hang.

Tua banga lei ah phum ciangin mi pai lohna, gamdaihna, a kilawm mun khat ah phum ding hi hang.

Thupha kipiasa vante pen ninbung sungah pai ziauziau lo ding.

Nin mawkmawkte bangin ngaihsun lo ding.

A kihhuaina mun, azahtak huailohna mun te ah koih lo ding.

Siangtho Pumpi (Eucharist) tawh kisai in theih ding

Thupha kipia Khomun (Siangtho Pumpi) in Sacramental hilo hi. Sacrament hi. Tua in Topa Jesu ii pumpi taktak hi. A zenzen in Siangtho Pumpi lei lak, sual tungah kia, kisia cih bangin ahih leh a siangtho le sang kik pahin. A siangtho kei le tui sungah koihin tui sakin. Tua a tui pen Biakinn aom asiangtho Biakpiakna akizangh vante sawpna mun (Sacrarium) ahi, lei sungah tui alut suak theihna munah bua ding hi hang.

Hih Siangtho Pumpi tawh kisai pen Siampi (ahih keile) Pasian nasem te in hih ding kilawm hi.

Thupha kipiasa vante in Pasian kiangah hong tunpih, lam honglak vante hi. Tua te lui in akisia phial zongin thupha akipiak hun lai mah bangin zahtakna nei ding hi hang.

“Thupha kipiasa na khat peuhpeuh, zulhtakin pai lo-in zahtakna tawh Pasian kiangah ap kik ding hi hang.”