Misiangtho Julia pawini. (May – 23)
Misiangtho Julia pen Corsica ah AD 420 hunin suak hi. A nulepa te pen minamlian leh ahau mahmah te ahi uh hi. Julia in aneu lai-in akhua uh ki do aa, (စစ်သုံ့ပန်း) dingin matna thuak hi. Tua pan mihau khat in Julia ama sila dingin lei hi. Julia in ahih leh sila khat asuak hangin phamawh sa se lo in ”Pasian in kei tungah adeihna khat om hi in teh” ci- in san siam mahmah hi. Julia in aman hunin thungetna leh Pasian thu tawh kisai lai te sim in ahun awng beisak den hi. Amah a lei mihaupa zong mipil, mitei khat hi a, athumang leh Pasian thu ahahkat Julia angahna hangin ki angtang mah mah hi. Amah Lawki biakna zui himah taleh Julia’ biakna leh upna zong khaktan selo in suakta takin om sak hi.
Ni khat mihaupa in Julia’ kiangah Piantit (France) gam ah pai ni a cih leh Julia in ”aw” ci- in thukim pah aa, anih un apai uh leh lam kal khuakhatah Lawki biakna pawipi khat tuak uh hi. Tua pawi ah mihaupa pai aa Julia in azui kei hi. Julia apai loh lam hausapa in atheih ciangin heh mahmah aa ih biakna alangpang kua ahi hiam ci-in ki ko gawp hi. Tua ciangin mihaupa in amah Julia hi a, Christian hi ci-in agen leh hausapa in tua nu kei hong pia in, ken nang sila numei 4 hong pia ning acih leh mihaupa in amah hongpia zo kei ning. Na neih nalamh khempeuh tawh zong amah lei zo kei ni teh. Bangbang apiang zongin ken amah zuak zo kei ning, kaneih kalamh khempeuh kasuplawh phial zongin amah tanlawh zo kei ning ci- in dawng hi.
Ni khat ciangin mihaupa a ihmut kal in hausapa hong pai aa, Julia kiangah ka lawki pasian nabiak leh sila nahihna pan kong khahkhia ding hi acih leh Julia in ”lawki pasian bia zo kei ning, anungta tawntung Pasian bek bia ning, sila ka hih napan hong khahkhia nuam dahin” ci- in hangsan takin dawng hi.
Tua ciangin hausapa heh lua aa Julia’ paang deihtakin beng hi. Tua khit ciangin Singlamteh tungah khai- in that hi. Tua hun lai tak in Julia kum 30 pha hi. Topa Jesu sungah citakin, Topa Jesu bangin sihna thuak aa, Topa Jesu tawh a ki bangin thokikin tawntung nuntakna angah ding pen pelh lo hi.
Tua hi a, ei thuzui mimal khat ciat in zong Pasian tungah ih upna khahsuah lo-in ih kip tawntung nading, tu ni Misiangtho Julia beelin thungen ciat ni.
Misiangtho Julia aw……Ko te a dingin thu hong ngetsak in.
