LUNGKHAM SINGIM HUNIN HONG OMPIH DING VANTUNG LAWMTE
Na lungkhamna, na lungkiatna, hitaleh lungsim lam tawh kisai bangbang haksatnate tawh na kituah hangin nang bek na hih loh banah tua lunggimna te nang bekin puak kul lo hi.
Catholic Pawlpi in i gentheih haksatnate hong theihsiam in eite adingin Pasian kiangah huhna hong nget sak ding a vanglian vantung lawmte hong pia hi.
Tua vantung lawmte in,
Misiangtho Dymphan, Mst Jude, Mst Rita of Cascia leh Mst Philip Neri te ahi uh hi.
(Misiangtho Dymphna)
Amahin lungkhamna, lungkiatna, lungsim damlohna leh အာရုံကြော tawh kisai damlo mite ahuh Misiangtho ahi hi. Amahin lauhuaina tampi kawmkal pan hangsan takin a suakta, Pasian a bel mahmah nungakno khat hi. Mitampite in ama ii avanglian thungetsakna hangin lungnopna mu in ngah uh hi.
(Misiangtho Jude)
Amah in Lametna bei mite ahuh phadiak Misiangtho hi. Khim khua zingin bang mah hi thei nawnkei ci-in lametna bei hun ciangin tua hi thei nawnkei inteh cih lungkhiatna pan suahtak nadingin mitampite in Misiangtho Jude beelin thungen den uh hi.
(Misiangtho Rita of Cascia)
Amahin ahi thei lo tuahkhaknate tawh haksat lungkhamna athuak mite ahuh phadiak Misiangtho hi. Amah mahin gentheih haksatna tampite thuakin akalsuan khat ahih mah bangin lungkiatna leh leitung haksatna te a thuak mite ahehpih mahmah lawmhoih khat ahi hi.
(Misiangtho Philip Neri)
Amahin athalawp le mite lungnop nadingin ciamnuih a gen thei khatin minthang hi.Amahin i thanem hun sung nangawnin lungnopna taktakin Pasian kiangpan bekin hong pai ahihna hong theihsak kawmin, lungkhamna tawh akidim mite huh thei hi.
“Misiangtho Dymphan, Mst Jude, Mst Rita of Cascia leh Mst Philip Neri te aw…kote adingin thu hong ngetsak un. Ka lungsim sungah lungnopna, Ka lungtang sungah lametna, ka kha lungsim sungah damna thuphate hong puak ta un. Amen.”
Lungsim tawh kisai gentheihna cihin a om takpi mah ahi hi. Ahi zongin Pasian hehpihna in zong a om takpi mah ahi hi. Tua ahih manin Pasian kiangah thungenin belh ding cikmah hunin maizum kei-in.
