NulePa te khempeuhin atuak khak uh haksatna khatin naupangno kum 1-2 gualte in thu a manglohna, a genhakna ahi hi. Hi bang hunin NulePa te in hehna, totna, satna taina cih bang hih thei hi. Ahi zongin naupang hi bang gualte in thu amang lohna pen amau khantohna tawh kizui apiang hi a, angeina ahi hi. Amaute in NulePa thu amang loh hangin NulePa te a langpang hituanlo hi. Amau ii khantohna tawh kizui apiang ahihna NulePa te in theih siam ding kisam hi.
Naupangte in bang hangin thu mang lo ahi uh hiam cih en ni.
Amasa penin khuak khantohna kicing nailo ahih man hi. Toddler gual naupangte ii khuakin ngaihsut theihna khangto nailo hi. Amaute in amau ut bangin om nuam, hih nuam in thukhun cihte a tel nading uh haksa hi.
Nihna ah lungsim paizia aki kep zawh nailoh man hi. Hi bang gual naupangte in amau lungsim sung apiang thu te kep zawhna nei nailo uh hi. Tua ahih manin amaute in hehna, kahna, otna cihte hih thei uh hi.
Thumna ah amaute ii lunglutna hun tom lua ahih man hi. Hi bang gual naupangte in na khat peuhpeuh tungah alunglut hun tom mahmah hi. Amaute in na khat pen tawmvei sung bek lunglut zo uh a, alungsim uh kikhel baih thei hi.
Lina ah amaute in sin nopna lungsim tampi aneih man ahi hi. Hi bang gual naupangte in kiim le paam en in sin nopna lungsim tam mahmah hi. Tua ahih manin NulePa te in hih kei in, khoih kei in, len kei in ci leh amaute in hih nuam semsem thei uh hi.
A tawpna ah amaute in kampau kicing nailo uh ahih man hi. Hi bang gual naupang atamzaw in hoih takin pau thei nailo uh ahih manin amaute lungsim sung aom te a lahkhiat ding haksa hi. Tua ahih manin amau deihna te angah nading un, kapin, awngin cih bangin lakkhia thei hi.
Hi bang gual naupangte in leitung amu khia pan ahih manun, amaute’ khuak leh lungsim lam khantohna te kicing nailo hi. Amaute in thu khunte tel/thei nailo uh ahih manin “semin, sem kei in” cih te tel nailo uh hi. Hi pen ngeina khat hi a, kum tawh kizui in tel siamnate ki nei hi.
Naupangte koi ci bangin panpih ding
Thuak zo in – Naupangte in a khangto laitak hun ahih manin thei siam in. Naupang pen hilh zelzel ding kisam kha thei ding hi.
A tel baih lamlahna te pia in – “Hi kimawlna paai kei in” cih sangin “hi kimawlna hi lai ah koihin” ci-in gen hi.
A hoih lam tawh thapiakna nei in – Naupang in hoihtakin thu amang ciangin phat in, pahtawi in.
Thu khunte a tel baih nadingin gen in – Hi bangin hih leng bang ci ding cihte hoih tak hilh in. Mei khoih kei in cihna sangin mei khoih le hang sa hi, meima ngah ding cih bangin gen in.
Naupangte in thu amang lohna pen ngeina hi a, Nu le Pa te in lungduai takin ahoih lam tawh lamlahna, thu hilhna te ih neih ding thupi hi.