Pasian’ Nu Maria Pawini.(January – 1)

A siangtho Tonu Maria pen Pasian I nu hi ci-in pawlpi kipat tung akipan kizahtak hi. AD 4 hun lai in Constantinople Siadawpa Nestorius in Tonu pen mihingin hong piang Topa Jesu I nu bek hi in Pasian I nu hilo hi ci hi. Ahi zongin AD 431 kumin Ephesus khua akibawl Siadawte meeting sungah Tonu pen Pasian ahi, Tapa Jesu i Nu ahih mah bangin Pasian i nu hi ci-in kipsakna leh tangkona nei uh hi. Meeting man khit ciang in thuzuite in lungdam takin khua sungah Siadawte dawn ngeingai uh hi. Tua banah meeting gualzawhna ciaptehna in Rome ah St. Mary biakinnpi khat lam pah hi.
Tua ni mahin Topa Jesu’ vun at pawi leh Jesu i min a khiatna min phuahpawi bawlkhawm pah hi. Jesu a kici min i khiatna in Gumpa, Honpa, Pasian cihna ahi hi. Banghang hiam cih leh a suak khit ni (8) ni ciangin a nu leh a pa in vun atna aneih ni-in amah a kipaai ma-a vantung mi in a phuah kholhsa mah bangin a min Jesu aphuak uh hi. (Lk 2:21) Hi thu in piancil (17:12) sungah Pasian in Jew minamte kiangah note lak panin ni giat apha pasal peuhmah vun ki-at ding hi, a cihna hang ahi hi. Vun ki-at na cih ciangin Pasian tungah apna cih khiatna nei hi.
Christu Topa’ Nu aw…Kote aading in thu hong ngetsak in.