KAL (KIDNEY) DAM LE DAMLO THEIH NADING NAM (8)
Kal pen ih pumpi adingin si le zun te hong khaih sak setzone tawh kibang hi. Si sung aom a nin te hong hepkhiat sak hi. Si khang si kiam hong kep sak hi. Guh khauhsak hi. Tua ahih manin Kal a cidam ding thupi mahmah hi. Kal natna pen ki thei pah khol lo in natna asawt ciangin kiphawk kha pan thei hi. Ahi zongin ih phawk baih theih nading thu pawl khat om hi.
1. Gim/Tawl baih, Tha kiam
Kal ahoihloh/ a cidam loh ciangin si sungah ninte kikhawmin pumpi tawl baih hi.
2. Khe/ Khengawng/ Mitkhu bawk
Pumpi sunga aval tui te leh Sodium dat te Kal in ahepkhiat zawh nawnloh ciangin khe, mitkhu cihte bawk thei hi. Khat veivei ciangin khut le mai te zong bawk thei hi.
3. Zunthak hun kikhel
Zunthak hun tawm deuh (ahihkeileh) Zun tha pahpah, zan sungah zun suak hun a tampian ciangin Kal natna lim hi thei hi.
4. Zun sungah si (ahihkeileh) aphuan cih te kihel
Kal cidam kei leh zun sungah si hong kihel thei hi. Tua banah Protein dat akihel ciangin zun sungah aphuan om thei hi.
5. Ci le Sa te keu in thak
Kal in pumpi sunga ninte a hepkhiat zawh nawnloh ciangin tua ninte in si sungah kikhawm uh hi. Tua ciangin ci le sa te keu in thak thei a, ci tungah tho peh bang danin piang thei hi.
6. Kawng nuai lam na
Kal pen khawng ii pang lam, nakguh nuai ah om hi. Tua ahih manin Kal sung buaina om leh tua mun kiim teng na thei hi. A diakdiakin Kal sungah suang om, Kal sung ah lungno lut cih bang te ahih ciangin ki thei phadiak hi.
7. An nek nopna tha omlo, sungnim, lua
Kal ii nasepna akiat ciangin si sungah ninte kikhawm ahih manin an nek nopna lungsim omlo, sungnim, a limna thei lo cih bangte hi thei hi.
8. Thagui tai
Kal natna nei te in si sungah Electrolyte dat te ahi, Calcium, Phosphate, Potassium dat te kikim lo ahih manin thagui tai, thagui kikang cih bangte hi thei hi.
Hih nam (8) te sung pan khat leh nih sangin a tam zaw na thuak leh siavuan te kiangah kilak huai hi.
