Monthly Recollection of Diocesan Staff Held at the Diocesan Centre, Kalaymyo (31 July 2026)

Tuni Kalay Diocese Centre aa Commission tuamtuam pan Zum nasem te ii nilang sung Pasianthu lungngaihna pen Khuamnuai Parish acing akem Rev. Fr. Cyril Dongh Suan Pau makaihna tawh nuamtak in ki bawl hi.

Amah in (Lk 10:25-37) na bulphuhin Samaria mi hoihpa thu tawh gentehin na hoih sep dingzia tawh kisai hilhcianna nei hi. Tua sungah mihing khatin ih khantoh nading in na sepna peuh ah 1. Right Intention- ngimna tupna/ ngaihsutna hoih nei ding 2. Formal training- Sep ding bawlding te gim ing tawling cilo-in sem den ding cih thu leh 3. Sufficient investment – a meet a pung ding lametna/muhkholhna tawh ih hun leh ih neihsa te zang ngam piakhia ngam ding cih thu te leh IQ leh EQ te a nih in a kisapna thu te limtakin hilhcianna nei hi.

A tawpna ah nasepna khat peuh peuh ah midangte tungah itna leh hephihna neih ding a thupi pen hi ci-in (Lk 6:36) na sungah “Napa un hong hehpih mah bangin note in zong hehpihna na nei un” cih Pasian kammal tawh thu khupna nei hi.

Hih Pasian thu lungngaihna ah Siampi (4) leh zum nasemte mi (40) kim kihel thei in hun dang sangin Zum nasemte a tawm zaw cih ding ahi hi.

Hih Pasian thu lungngaihna hun sungin a ngaina mah bangin thu genna, Pasian thu lungngaihna, Mawhsutna, khikhinna leh Missa Biakpiakna cih te nuamtak in ki nei-in sunan nekna tawh nilang Pasian thu lungngaihna nuamtak in ki mansiang hi.