Bishop Felix Visits Tamu Myo After More Than Five Years for Confirmation and Golden Jubilee Celebration (25. 10. 2026)

Gamsung vai buaina hang tawh Siadawpa pen Tamu Myo a tun lohzawh kum 5 val bang sawtta hi mah ta leh tu-in Tamu myo ah Catholic upna khaici a kituh zawh kum (50) cin Jubilee Pawi a bawl ding leh naupangte mi (100) val Christma Hanthotna a pia dingin pai thei a hih manin inntek Siampipa Rev. Fr. Dal Ngaih Do leh thuzuite in lawpna tawh nasia takin vaidawnna nei uh hi.

Nupa kop (4) te ii kitenzawh kum (25) Jubilee pawi zong bawlsak in tha kingah mahmah hi. Hih pawi sungah Bishop Felix in a nuai a bangin kha-an vakna nei hi.

Homily on the Sacrament of Confirmation and the Golden Jubilee of the Catholic Church in Tamu Parish (25 October 2026)

Christu sungah kongit thuzui nulepa ulenau te, tuni pen eite aa dingin Ni Thupi mahmah ni khat ahi hi. Ih tanu ih tapa te in te in Christmas Hanthotna a san ni, Khasiangtho Pasian a san na pawi leh ei Tamu Parish sungah Catholic Upna Khaici ahong tunzawh kum (50) Golden Jubilee Pawipi ih bawlni ahi hi.

Hih Pawi namnihte pen Catholic upna sungah a thupi mahmah ahi hi. Hi tenih pen bangci bangin kizom hiam cih en dih ni. Christmas Hanthotna in bang hong phawksak hiam cih leh hih ih tanu ih tapa te tungah Pentecost hun lai-in Nunzuipite tungah Khasiangtho a kumsuk mah bangin Khasiangtho a hong kumsuk ding ahi hi. Amaute in a lamdang takin Khasiangtho asang dinguh hita hi.

Tua mah bangin ih Golden Jubilee Pawipi in eite bang hong phawksak hiam cih leh tuma kum (50) pekpanin ih Pu ih Pa, i Pi i Pu, I Nu I Pa te a makaih, a om pih akhangtosak, upna lamah a picingsak Khasiangtho Pasian in tuni dongin eite hong ompih, hong makaih den hi cih thu hong phawksak pha mahmah hi.

Tua ahih manin hih Christmas Hanthohna (Khasiangtho sanna) pawi leh ih Golden Jubilee Pawi bawlna sungah bangthu bawk den ding ih hi hiam cih leh Khasiangtho Pasian in ih Catholic Pawlpi sungah a beisa hunin ih Pu ih Pa te a makaih mah bangin, tuni in zong eite hong makaih hi cih thu phawk den ni. Tua banah mai lam hunte ah zong a tawntungin ih Pawlpi hong makaih den ding hi cih ih phawk ding kong deih hi.

Tua banah hih pawi namnih tawh kizawitawnin ih thubulphuh dingin bang teel ka hiam cih leh “Rooted in Christ, Strengthened by the Holy Spirit, and Sent to Witness to the Gospel” “Jesu Christu sungah zungthukkha in Khasiangtho thapiakna tawh Lungdamnathu tetti apangte hi ni” cih pen ih thubulphuh ding leh ih nuntakpih dingin ka deih mahmah hi.

Hih I thubulphuhna tawh kizui-in eite khat ciatin tuni-in thu namthum ih ngaihsut dingin ka deih hi. Khatna ah (1) Eite Upna koi pan hong pai ahi hiam (2) Tuni-in bang thupha ngah ka hihiam cih thu leh (3) Pasian in mailamah ih sep ding bang vaipuak hongpia hiam cih thu te ei leh ei ki dongkik phapha ni.

Hih (1Cor 3: 6) nasungah “Keimah in ka suan a, Apollos in tui a buak hi. A kung a khangsak pa ahih leh Pasian ahi hi.” Acih mahbangin I Pu I Pa te in hih Jubilee Pawi -ih bawltheih nadingin Upna Khaici hong vawh khinta hi. Eite in tui ih buak ding kisam ta hi. Tua hi leh tuni-in ih san eite khatciat sunga a om Khasiangtho Pasian in a kung hong khaksak ding hi.

Tuni-in eite in Christian Catholic upna ih ngah pen amawkmawk in ih ngaihsut ding hilo hi. Ih Golden Jubilee Pawi bawlna te phawk ni. Ih Pu ih Pa te in Lawki Dawibiakna panin Christian a suah nadingun bangzahta in hamsatna na thuak hiam cih ngaihsun kik kik ni. Ei Catholic Pawlpi te pen khang tangthu a nei pawlpi ih hi hi.

Jubilee Pawi ih bawlna in, ih tangthu te a sutsut ih hi hi. Ih Khangtangthu sungah Pasian ii hong ompihna, Khasiangtho Pasian ii hong makaihna te a en kikkik ihhi hi. Abeisa hun pan kipan tuni ciangdong Pasian ii hong ompihna te lungdam a ko ihhi hi. Tuni in eite khatciat ih nuntakna kingaihsun dih ni. Ih Pu ihPa te upna bangin upna ka nei hiam, ka Christian upna ka nuntak pih hiam, ka upna te gamtathoihna tawh ka lak hiam cih te en kikkik ni.

Tuni-in nah eite khat ciat in ih Christian upna te ih nuntakpih ding kisam hi. Tua bangin ih nuntakpih khitteh ih upna te midangte tungah tetti ih pan ding, ih hopsawn ding, ih sansa ihngahsa lungdamna thu te midangte tungah ih tangko ding kisam hi. Tua hi leh nidang ciangin zong ih tu ih ta te in kum (75) cin Diamond Jubilee Pawi, kum (100) cin Centenary Jubilee Pawi te aa ki pan a banban in a bawl zo pan ding ahi uh hi. Tua hi leh tuni-in ih Jubilee pawi bawlna te hong picing pan ding hi.

Ih thukhupna dingin tuni hun nautang nipi (30) ni aa ih sim lungdamna laisiangtho (Mt 22:34-40) na sungah Topa Jesu in Pharisee te leh Sadducee te kiangah thukham lakah bangin alian pen hiam cih thu a hilhna thu ih nuntak pih dingin ka deih hi.

Tua in banghiam cih leh “na Topa Pasian pen na lungsim khempeuh, na kha khempeuh, na ngaihsutna khempeuh tawh na it-in a cih thu leh nang le nang na ki-it mah bangin na vengte zong na it in” cih thu te ahi hi. Hih thu te phawk in ih nisim nuntakna ah Pasian nambat khat in ih koih khitteh ih vengte, midangte tungah itna ih lah den zawh nang hanciam ciat ni.

Nungzuipite in zong Khasiangtho a san ma-un launa leh liinna tawh a kidim uh hangin Khasiangtho a san khituhteh hangsan takin a upna te uh midangte tungah tangko ziahziah uh hi. Tua mah bangin eiten zong ih upna te midangte tungah tangko ciat ni.

Jubilee thupha note khatciat tungah hong tung ta hen! Amen.