“Nu le Pa”

Nu le Pa’ Pawi hong tungkik ding hi ta. Pasian khit ciang ih zahtak pen ding mihing in “Nu le Pa” ahihna thu Laisiangtho sungah Pasian’ Thukham piakna pan teltak in hong hilh hi.

Zahtakna:

Zahtakna cih kammal in thu tampi huam hi; tate/tanute’ nuntakzia, nu le pa tawh kizopzia ding hong hilh kammal ahihi.

“Zahtak” cih ciangin:

Ih zahtak mite ading anuampen tutna, anuampen khawlmun kivai hawm sak hi. Tua in nu le pa tungah piakding zahtak gamtatna ahihi.

Ih zahtak mite ahehding, akhasiat ding kideihlo hi. Tua in nu le pa tungah tate/tanute’ neihding lungsim puakzia ahihi.

Ih zahtak mite ading alimpen atuipen kipia nuam hi. Tua in nu le pa tungah tate/tanute’ kepzia khoizia ding vaipuak ahihi.

Ih zahtak mite honghawh honglen ciangin, a hoih pen kigeel sakin, a lempen ding kivai hawm sak hi. Tua in tate/tanute’n nu le pa ading avaihawmsak zia ding ahihi.

Ih zahtak mite mai-ah kamkhum kamhoih kipau in, aw-nem aw-khum kizang a, azakdah ding kammal kizang ngamlo hi. Tua in nu le pa tawh kizopna kihona te ah tate/tanute’ pauzia kizopzia ding ahihi.

Zahtakna tawh kisai thu le nate khempeuh Pasian khit ciangin nu le pa ih piak masak ding ahihi. Ih piakna mun, ih piakna a mi khialh loh ding thupi hi.