Ta te a susia itna
*Itna pen suksiatna tawh ki zo sak kha kei in.*
“Ka nu, ken hi meh duh keng, ma pen tawh ne ning.”
A nu muhna pan a ta nget meh tawh ne sak ziau leh bengngong pha lel ci’n ngaihsun kha ding hi. Ahi zongin naupang’ lungsim sungah ka duh bangin ka ut bangin ki ne thei, ka duh zah ne ding cih lungsim nei sak hi. Na khat peuh peuh ah thukhun, ciangtan ki sam lo cih lungsim naupang sungah dam dam in a lut lam a Nu in thei kha lo hi.
“Ka nu, kei tu ni sangkah nuam lo,” “aw..khuan hong nget sak ning ei.”
Hi nupi nu ii ngaihsutna ah nikhat sang pai kei hangin bang mah ci sam lo ding ci’n ngaihsun kha ding hi.
A taktak in man takin sang kah ding cih thukhun olno takin paltat ding lamlahna tawh ki bang hi. Ni khat sang kah loh bangmah a cih kei hangin naupang ii lungsim sungah “ka kah nop kei leh zong ki ngah lel” cih lungsim lut in vai khat peuhpeuh ah olno takin zuih noplohna lungsim khang sak hi. Tua thu a nu in thei kha lo hi.
“Ka nu, kei mi tawh ki tawng,” “aw…thuak kenkan lo-in zawh sawm o, hong piang thu khempeuh hong vaan sak ning ei.”
Hi nupi nu muhna ah buaina khat peuh peuh ah a ta bek in zo ding, bang bang a piang zong aman panpih ding cih dan hi.
A taktak in tua naupang in buaina khat peuh tawh a ki tuah ciang, ama kum tawh ki zui-in khentat zo nawnlo in vai khat peuh peuh ah khut leh khe zang pah ding cih lungsim leh bang bang ka hih zongin ka nu ka pa in hong panpih ding cih lungsim nei sak hi. A nu in tua bang te ngaihsun kha lo hi.
Naupang cihin na khat peuh peuh hih/sin nuam hi. (naupang te a mau kum tawh ki tuakin thu hilh ding, tai ding, panpih ding hun om hi.) A liat ciangin ki khel lel in teh cih theih omlo hi. A neu tungpanin amah leh amah ki uk theih na hilh ding hi.
A khedap amah leh amah hoih takin suah sak in. An anek ciangin a themneng a kiat sak loh na dingin sinsak in, tha om nading khat peuh na piak ciangin a vekin a nek nading hanciam pih in.
A kimawlna te amah leh amah hoih takin seng kik sakin. (A seng nop kei leh ama utna te hih sak ken. Aneu tung panin hilhin pattah ding ki sam hi.)
A neu tung pan a ki uk thei lo naupang in a liat ciangin zong ki uk thei lo-in, thukhun zui zo lo ding a, thukhun khat peuh peuh a zuih ding haksa sa ding hi.
Naupang te tungah piak ding, apicing lungdam kipak na in amau hong nget khempeuh piak pah pah na, ama ut na mun khempeuh ah paipihna te hi lo hi.
Tu laitak a a om na mun, a om na nuntak zia sungah hita leh kiim leh paam ah hita leh ama kum tawh ki tuakin ama theihna, ngaihsut theihna tawh sikan om takin lungdam kipak sak ding ahi hi.
Naupang ihmu ahih manin phot nop loh manin tho lo-in sang kah lohna pen a thupi lo bangin a ngaihsun nu leh pa te, naupang maitang leh phone ki khen lo-in a en a ta pen ki gen zo kei cih paulap tawh a phone a en sak suak nu leh pa te, ei a nu leh pa te theih loh te, phone a et na pan a man thei hi ci-in a ki pak nu leh pa te, Nikhat nai 10:00 sung lai en sakin a liat ciangin mipil suak lim lim ding hi ci-in a ngaihsun nu leh pa te, Naupangin ulian te kampau bangin mi a tot theihna pen kam pau siam hi ci-in a pakta nu leh pa te, Naupang in Beer adawn mi te lakah tu in a dawn ciangin sia pipa hi ci-in ki pak/ ki angtang nading a zong nu leh pa te, kiim leh paam ah tampi ki mu hi.
Nang ii na ta na ut bang in na hih thei hi. Na ut bangin lam na lak thei a, thu hilhin na makaih ding hi. Ahi zongin khat ah- ut bangin a ki paai ziau khai ci…a ut bangin po in khang khia hi cih mangngilh kei in. (Itna pen suksiatna tawh ki zo sak kha kei in.)
