KIKHEL NADINGIN AHUNIN “ZING CING HILO IN TUNI, MAILAM AH HILO IN TU MAHMAH”
Vatican thu kizaksakna zumpi pan February 25 ni-in a khahkhiat, April kha sung Algeria, Cameroon, Angola, Equatorial Guinea gam te ah 13-23, ni (10) sung Pope Leo XIV ii tuucing khualzinna mah bangin tuni April 17 ni, Africa gam ah khualzinna ii a nili na ni in amah in Cameroon gam aom, buainate apianna mun ah pai in, “kikhel nadingin zing ciang hilo in tuni, mailam ah hilo tu mahmah” ahihna thu khauh takin gen hi.
Ni li ni in Pope Leo in Mang kampauna mun buaina (Anglophone Crisis) ci-in mitam theih ahi, kumzalom khat asawt buaina bulpi ahi, Cameroon gam, Bamenda khua ah pai hi.
2016 kum pekin Cameroon gam aom, Mang kam pau mi tawmkhat sungpan singnuaimi kipawlnate in gam ii mun pawlkhatte ah gam khat phut dingin ahanciamna uh hangin kumpi galkapte tawh kidonate apiang ahi hi.
Kithahna le supna bainate
Bamenda khua ah atun ciangin Pope in Pawlpi makaite le khua uk te, khua sung makaite tawh kilemna tawh kisai kimuhkhopna khat nei in tua kimuhkhopna ah St. Joseph Cathedral ii asung le apua ah mihonpi in laamna le lasakna tawh hong tung ngeingai uh hi.
“Gal kumpite in a susia dingin tawmvei sungbek a sawt hangin puahthak kik nadingin nuntak sung tawntung nangawn kicing lo hi cih ki theihmawh bawl uh hi” ci-in Pope in tua lai ah apai mihonpite gen hi.
“Kithahna le suksiatnate ading dolar tampi abei lawh uh hangin cidamna, pilsinna leh puahthak kik nading akisam bulpite koi mahah ki zong zolo hi ci-in amaute in kitheihmawh bawlin om uh hi.” Tua banah leitung mun tuamtuam aom media te in a pulak uh mah bangin “leitungin aana/thu nei mi pawlkhatte hangin kisia hi” ci-in Pope in gen hi.
Ahi zo ding a thak te
Mang kampau mun buaina in 2016 kumin kipanin tuni dong kilem nading thukimna ngah nading hanciamnate khempeuh kisum hi. Nitak lam ah Bamenda vanleng kuan aom kikhopna ah a gen in ah Pope in tu laitak hunin “lungkia in supna le huh ding neih lohna” cihte hong piang sak zo ding hi ci-in gen hi.
Ahi zongin Pope in “Pasian kammal in ahi zo ding a thakte hong hon sak hi, tua in eite’ lungtang hong khanglo sak zo in thu piangte paltan zawhna nei hi” ci-in thu thuk takin gen hi. Ki khel nadingin a hun hong tung ta ahihna le “zing ciang hilo in tuni, mailam ah hilo in tu mahmah” ci-in gen hi.
Kal suanna
A nasia mahmah buainate kumzalom khat val ahih khit ciangin Cameroon gam W,N leh W,S mun aom mipite in Pope ii tuucing khualzin na in kilemna lampi hong hon sak takpi ding hi ci-in lamen uh hi.
Vatican News zum tawh a kihona ah Buea pan Bishop Michael Bibi in Pope ii tuu cing khualzinna a pahtawina in Mang kam pau nading kikhenna cih kipawlna te in ni thum sung kido kikapna khawl ding ci-in tangko hi cih thu leh tua in amasa pen ahihna ciaptehna nei hi.
Tu laitakin akisam in gal kidona apiangna/sak kipawlna tuamtuam te lam pan “hong kipawl khawmin, hi laitak pan mai ah koi ci bangin kalsuan ding ih hi hiam cih hong dot ding uh hi” ci-in Bishop Bibi in gen hi.
Photo Credit: Vatican News
