Misiangtho Rita of Cascia pawini. (May – 22)

Rita nulepate in Italy gam Umbria mualtung Appennine ah teeng hi. Rita a kituisawp ciangin a Misiangtho min dingin Marger Rita kipia hi. A nu le a pate in amau a sih khit ciangin a tanu uh muan leh suan nei loin amah bek a om ding lunghimawh uh ahih manin Paul Ferdinand tawh kiteengsak hi.
A lawmpa tawh a kiteen uh kum (18) sungin tapa nih nei uh hi. Pasian thu a upna hangin a pasal in Rita zahpihin simmawh bawl lua ahih manin a nuntakna ah nopsakna nei ngeilo hi. A diakdiakin zu a kham ciangin huaisia pen hi. A tapa nih tawh Rita nisimin kikhawm in, Misssa a ngai den uh hi. Pasian bek muangin thungen den ahih manin a thungetna Topa’n dawng hi. A pasal Ferdinand a gamtat hong kikhel-a a innkuan sung uh hong nop mahmah hi.
A beisa hun-a mi tawh a kilem lohna hangin Paul Ferdinand mi khutlum-in si hi. A tapate-gel in a pa a thatte tungah a pa phu la-in thahkik sawm uh ahih manin Rita a lunghimawh mahmah hi. Tua ahih manin Rita in a tate-gel in mawhna lianpi bawl-a meikuangpi sung a tun ding uh sangin sisak baihzaw in, ci-in Pasian kiangah thu ngen hi. Topa in a thungetna dawng-a, a tate-gel mawhna lian a bawl ma-un si uh hi. Amaute-gel meikuangpi sung tung lo ding uh ahih manin Rita nuam mahmah-a, Pasian deihna sang siamin lungdam ko hi.
A pasal leh a tate a sih khit ciangin Rita in Pasian na nakpi takin sep ding khentat-a, Augustinian Sister sangah lut theihna ding phalna ngen hi. Ahi zongin amah nupi khinsa meigong khat ahih manin tua sangah kisang lo hi. Tua ciangin aman nasia takin thunget hanciam semsem ahih manin a belh ding hong om ta hi. St. Augustine leh Tolentino khua pan St. Nicholas, St. John the Baptist te, Rita inn ah hong pai uh a, Augustinian Sister sangah amah paipih uh hi. Tua Sister sanghuang hoih takin a ki-umcip bikbek hi-a, a dai kongkhakpi uh zong limtakin a kikalh ahi hi. Ahi zongin amaute a pai uh ciangin kongkhakpite Pasian vangliatna tawh kihongin, a meivakte uh zong hong tang ziazua hi. Rita zomg a sungah lutin khukdinin thu a ngen hi. Sister te zong hong pai in, thupiangte dong uh hi. Rita in a thupiang khempeuh a gen ciangin sister-te in a Sister puante uh la-in Rita silhsak pah uh-a, amau tawh omkhawm sak uh hi.
Rita in hizahtakin a lian Pasian thuphate bangci thuhkik ding cih, a ngaihsunsun hi. Tua ciangin Marches khua St. James i thugente phawkin Topa Jesu thuak gimna lak pan khat, amah a thuaksakna dingin Rita in Pasian kiangah thungenin thuum hi. Tua laitakin Topa Jesu lutunga lingkual pan ling khat in Rita taltang hong dawtsuk hi. Tua hun-a kipan Rita in nakpitak natna hong thuak hi. Tua ling in a sutna, a sawt semsem ciagnin namsia mahmah ahih manin a gamla mun khat ah, amah kituam koihta hi. Kum (46) a phak kum, a sih ding ni (3) in a sap ciangin amah vehin a hehnem dingin Topa Jesu leh Tonu Maria te pai uh hi. A mah a sih khit vantung gam a lut ciangin ama omna lui, inndei sung hong namtui mahmah a, biakinn dakte zong kuama tum, kuama sat lohpi-in hong ging ziahziah hi.
1627 kum ciangin Pope Urban VIII in Rita misiangtho suak hi, ci-in tangko khia hi. Rita i luang zong a sih khit kum (150) a cin ciangin muat lo-in om lai hi. Rita in a sih khit ciangin na lamdang tampi lak-a, cinate zong damsak hi. A mit mahmah uh tawh a va mu mite genna ah: Khat veivei ciangin Misiangtho Rita mittangte hak zel hi, ci uh hi. Kum tampi khit ciangin a luang zong ama thu-in, amah leh amah kihei-in a langlam na nga zel hi, ci-in kigen hi. NulePa, ulenaute tuni Misiangtho Rita beelin ih upna akhang semsem nading hita leh ih ki sap thupha te Topa Jesu kiangah ngen ciat ni.
Misiangtho Rita aw……Ko te aa dingin thu hong ngetsak tan.