Roman Catholic Bishops Wearing Roman Collars
Roman Catholic Bishops Wearing Roman Collars (June 11, 2026)
Hih man te pen Kawlgam pan Siadaw teng Rome ah Ad Limina Visit ci-in Pope Leo XIV na tawh a ki mu dingin a pan na Rome Khuapi ah June 11, 2026 ni-in a ki zaih Kawlgam Siadaw Siampilian te in Roman Collar puan a silhna man te a hi hi.
Topa Jesu phuhsa Pawlpi ii phungpi pen Rome Khuapi hi-in tua Khuapi pan Mission Pasian thu tangko na ki pan khia ahih manin tua Pawlpi pen Roman Catholic Mission – Rome Khuapi tawh a kizom mikhempeuh tawh a kisai Lungdamnathu tangkona (RCM) Pawlpi kici hi. Tua Pawlpi pen Christian teng khempeuh ii kipat khiatna phungpi Roman Catholic Pawlpi ahi hi.
Tua Pawlpi sungah Topa Jesu ii teelsa Pasian nasem Siampi om in tua Siampite vanzat ding te zong a tuam vilvelin ciaptehna kinei hi. Tua Siampite in Missa Biakpiakna abawl uh cingin (Cassock, Alb, Stole, Chasuble) cih bangin khiatna tuamtuam tawh a kisap hunhun in zang uh hi.
Tua khitteh Siampite in Puantual a silh loh hunsung in khualzin gam vak na ah zat tangzangin a silh dingun agawngah Collar a kang thuah theih dingin bawlin tua puan pen Roman Catholic Pawlpi sungah Siampite zatdingin a kibawl ahih manin (Roman Collar- Clerical Shirt) Siampi puan ci-in min kipia hi.
Banghangin RCM Pawlpi-in hibangin Siampite puansilh ding, zat tangzang dingin Roman Collar bawlsak hiam cih leh RCM Pawlpite pen leitungbuppi ah ki pumkhatin Tuucing khat khut nuai ah om in Siampi khat ahih nak leh leitungbup level in Siampi a suak hi pah ahih manin minam deidanna omlo in a paipai na, a zinsuk a zintohna te uh ah thuzuite in hi pa Siampi khat hi ci-in a theih na ding leh a kisap hunhun in tua Siampipa tung pan Siampi te piak theih thupha namkim te thuzuite in a san theih na ding cih ngimna tawh RCM Pawlpi sungah Siampite silh dingin (Roman Collar- Clerical Shirt) Siampi puan a ki bawl ahi hi.
Tua ahih manin hih (Roman Collar- Clerical Shirt) a silh mi peuhmah pen RCM Pawlpi sungah Siampi khat hi cih pen leitungbup ah ki thei ahih manin a paipai na uh ah hih Roman Collar puan a silh te pen (Father- Siampi) Topa ci-in kisam in Topa Jesu piak Siampi hihna vang tawh midangte sangin a thupi zawdiak in zahtakna kipia hi.
Tua bangin zahtakna kipia ahih manin RCM Pawlpi a tam phatdiakna Europe gam, USA gam, African gam, Philippines gam leh Singapore gam te ah Sumlepaai lungngulhna tawh Roman Collar Siampi puan silhin Siampi a kineih khem mi pawlkhat om thei zel uh hi.
Tua banah Pawldang Pastor te sung pan pawlkhat te in RCM Siampite mah bangin zahtakna a ki piak dinguh lungngulh ahih manun (Roman Collar-Clerical Shirt) Siampi puan a silhsim sak Pastor pawlkhat om mawk uh hi. Tua te pen ama hihna a dinpih ngamlo Va-ak tawh a kibang Pastor te ahi uh hi.
