NULEPA PAWI HONG PIANKHIATNA THU
Catholic Pawlpi sungah July 26 ni pen Misiangtho Joachim le Anna te Pawini in kiciamteh in, tua ni panin Nu le Pa, Pi le Pu te ading thungetsak diak ni (Nu le Pa) Pawi hong piankhiatna thu in anuai abang ahi hi.
Misiangtho Joachim le Anna
Misiangtho Joachim le Anna te in a Siangtho Tonu Maria ii Nu le Pa te (Topa Jesu ii Pi le Pu) te ahi uh hi.
Ta neihlohna leh thungetna
Amaute in Pasian thu ahanciam nupate ahih uh hangin a teek dongun ta neilo uh hi. Tua hunin ta neilo te pen Pasian thupha angahlo te ci-in kiciamteh ahih manin amaute in khasiatna, lungneuna te nasiatakin thuak uh hi.
Ahi zongin amaute in citak takin Pasian tungah thungen uh a, Vantungmi gen mah bangin leitung ahonkhia Topa ii Nu ahi ding “Maria” paai na thupha sang hi.
July 26 Ni
Eastern Church
Hih asiangtho Nu le Pa te zahtakna ni pen Eastern Church te ah kumzalom 4 hun pekin kipan ta hi.
Western Church
Pope Gregory XIII in hi a siangtho pawini pen Kumzalom 16 hun, 1584 kumin Pawlpi in a bawl nadingin kipsak hi.
1969 kum, Liturgy puahthakna aman khit ciangin Misiangtho Joachim le Anna te pawi gawmin July 26 ni-in bawl khop dingin kipsakna nei hi.
Nu le Pa pawi hong piankhiatna
Misiangtho Joachim le Anna te in Topa Jesu ii Nu, Tonu Maria pen Pasian deihna tawh kituakin apantah, lamlak Nu le Pa te ahih manun, Catholic Pawlpi in amaute’ Pawini pen Nu le Pa, Pi le Pu te Pawini in hong ciaptehsak ahi hi.
Hi pawi bawlna ii ngimna bulpi
Lungdam kohna
Tu le Ta te in mihing in hong piangkhia sakin hong pantah, hong makaih Nu le Pa, Pi le Pu te thuphate phawkin lungdam koh nading
Thungetsakna
A dam lai, anungta lai Nu le Pa te cidam nading leh thupha namcin angah nading, hong nusia sa Nu le Pa te kha in vantung gamnuam a tun theih nading thungetsak ding
Ettehna
Nu le Pa te lampan Misiangtho Joachim le Anna te bangin tu le ta te pen Pasian deihna tawh kituakin itna tawh pattah makaih zawh nading
Hi ni thupi ni in Catholic thuzuite in Missa biakpiakna sungah kihelin Nu le Pa te ading, thu ngetsak diak ding leh innkuan sungah Nu le Pa te zahtakna piakna, lungdamkohna te puakna te tawh a kibawl ahi hi.
Fr.Dominic Howe
